3 ஓவர்களில் ஒன்பது விக்கட்டுக்கள்...! டி20 கிரிக்கெட் வரலாற்றில் புதிய உலக சாதனை

Cricket World Sports

By Shalini Balachandran Apr 10, 2026 11:01 AM GMT

Shalini Balachandran

in விளையாட்டு

Report

சர்வதேச டி20 கிரிக்கெட் வரலாற்றில் ஒரே இன்னிங்ஸில் 9 விக்கெட்டுகளை வீழ்த்திய முதல் வீராங்கனை என்ற பிரம்மாண்ட உலக சாதனையைப் பிரேசில் நாட்டைச் சேர்ந்த லாரா கார்டோசோ (Lara Cardoso) படைத்துள்ளார்.

போட்ஸ்வானாவில் நடைபெற்று வரும் கலஹாரி மகளிர் டி20 தொடரில் லெசோதோ அணிக்கு எதிரான போட்டியில் வெறும் 3 ஓவர்கள் பந்துவீசி 4 ரன்களை மட்டுமே விட்டுக்கொடுத்து 9 விக்கெட்டுகளை (9-4) வீழ்த்தி அவர் இந்த வரலாற்று மைல்கல்லை எட்டியுள்ளார்.

இதன் மூலம், 2025-இல் பூட்டான் வீரர் சோனம் யேஷே (8 விக்கெட்டுகள்) மற்றும் 2024 இல் இந்தோனேசிய வீராங்கனை ரோமாலியா ஆகியோர் வசம் இருந்த முந்தைய சாதனைகளை கார்டோசோ முறியடித்துள்ளார்.

உலக சாதனை

இப்போட்டியில் முதலில் துடுப்பெடுத்தாடிய பிரேசில் அணி வழங்கிய 203 ரன்கள் என்ற இலக்கைத் துரத்திய லெசோதோ அணி, கார்டோசோவின் அசுர வேகப் பந்துவீச்சை எதிர்கொள்ள முடியாமல் 13 ரன்களுக்குச் சுருண்டது.

3 ஓவர்களில் ஒன்பது விக்கட்டுக்கள்...! டி20 கிரிக்கெட் வரலாற்றில் புதிய உலக சாதனை | Laura Cardoso Brazil 9 Wickets T20 World Record

குறிப்பாக, 21 வயதான கார்டோசோ தொடர்ச்சியாக 5 பந்துகளில் 5 விக்கெட்டுகளை வீழ்த்தி அதிர்ச்சியளித்தார்.

ஒரு இன்னிங்ஸில் உள்ள அனைத்து 10 விக்கெட்டுகளையும் கைப்பற்றும் அரிய வாய்ப்பு அவருக்குக் கிட்டிய போதிலும் கடைசி விக்கெட் ஸ்டம்பிங் முறையில் வீழ்ந்ததால் அந்த வாய்ப்பு நூலிழையில் கைநழுவியது.

அதிரடிப் பந்துவீச்சு

இருப்பினும், அவரது இந்த அபாரமான ஆட்டம் சர்வதேச கிரிக்கெட் வட்டாரத்தில் பெரும் வியப்பை ஏற்படுத்தியுள்ளது.

லாராவின் இந்தத் திறமையைப் பாராட்டியுள்ள பிரேசிலிய கிரிக்கெட் சங்கத் தலைவர் ராபர்ட்டா மொரெட்டி, அவர் எதிர்காலத்தில் இங்கிலாந்து மற்றும் ஆஸ்திரேலியா போன்ற நாடுகளின் உயர்மட்ட லீக் போட்டிகளில் விளையாடும் தகுதியுடையவர் எனப் புகழாரம் சூட்டியுள்ளார்.

பிரேசிலின் அடித்தள மட்டத்திலான கிரிக்கெட் திட்டங்கள் மூலம் உருவான மிகச்சிறந்த வீராங்கனை கார்டோசோ என அவர் பெருமிதம் தெரிவித்துள்ளார்.

லாராவின் அதிரடிப் பந்துவீச்சின் உதவியுடன் பிரேசில் அணி இத்தொடரில் இதுவரை ஆடிய 5 போட்டிகளிலும் தோல்வியுறாமல் முதலிடத்தில் நீடிக்கின்றமை குறிப்பிடத்தக்கது.