கொழும்பு துறைமுகத்தின் மீது உலகளாவிய கவனத்தை ஈர்த்த மத்திய கிழக்கு மோதல்
மத்திய கிழக்கில் தொடரும் மோதல், கொழும்பு துறைமுகத்தின் மீது உலகளாவிய கவனத்தை அதிகரித்துள்ளது என உலக வங்கி சுட்டிக்காட்டியுள்ளது..
அதன் எதிர்கால அபிவிருத்தி மற்றும் நிர்வாகத்தில் மிகுந்த கவனம் செலுத்துமாறும் இலங்கை அரசாங்கத்தை உலக வங்கி வலியுறுத்தியுள்ளது.
இது குறித்து அமைச்சக வளாகத்தில் சிவில் விமானப் போக்குவரத்து மற்றும் எரிசக்தி அமைச்சர் அனுர கருணாதிலகேவுடன் நடத்திய கலந்துரையாடலின்போது, இந்த விடயம் தெரிவிக்கப்பட்டுள்ளது.
சிரேஷ்ட அபிவிருத்தி
புதிய நிதி மாதிரிகள் மற்றும் தனியார் துறையின் விரிவான பங்கேற்பு உள்ளிட்ட கொழும்பு துறைமுகத்தின் எதிர்கால அபிவிருத்தி குறித்து விவாதிப்பதற்காக, நாட்டு மேலாளர் கெவொர்க் சர்க்சியன் தலைமையிலான உலக வங்கி தூதுக்குழுவினர், அமைச்சரையும் சிரேஷ்ட அபிவிருத்தி அதிகாரிகளையும் சந்தித்தபோது இந்தக் கருத்தைத் தெரிவித்தனர்.
கூட்டத்தின் போது, துறைமுகம் தொடர்பான அரசாங்கத்தின் திட்டங்கள் குறித்த சமீபத்திய நிலவரத்தை சர்க்சியன் கேட்டறிந்ததோடு, கொழும்பு துறைமுகத்தின் உள்கட்டமைப்பு மேம்பாடு குறித்து உலக வங்கி குழுமமும் ஆசிய அபிவிருத்தி வங்கியும் (ADB) கூட்டாக ஆய்வு ஒன்றை நடத்தி வருவதாகவும் குறிப்பிட்டார்.
தூதுக்குழுவினருக்குப் பதிலளித்த அமைச்சர் கருணாதிலகே, உலக வங்கி குழுமத்தால் சமர்ப்பிக்கப்பட்ட நிதி முன்மொழிவுகள் மற்றும் நிதி மாதிரிகளை அரசாங்கம் தற்போது மதிப்பீடு செய்து வருவதாகத் தெரிவித்தார்.
மேலும், இந்த முன்மொழிவுகளை மதிப்பாய்வு செய்து அங்கீகரிப்பதில் நிதி அமைச்சகமும் திறைசேரியும் முக்கியப் பங்கு வகிக்கும் என்றும் அவர் கூறினார். கிழக்கு கொள்கலன் முனையத்தை (ECT) ஒரு தனி நிறுவனமாக மேம்படுத்துவதற்கான திட்டங்கள் குறித்தும் இந்த விவாதங்களில் கவனம் செலுத்தப்பட்டது.
தனியார் துறைப் பங்கேற்பு
முன்மொழியப்பட்ட இந்த மறுசீரமைப்பு குறித்து அரசு தலைமை சட்டத்தரணியின் ஆலோசனையைக் கோரியுள்ளதாகவும், தொழிற்சங்கங்களின் ஆதரவை உறுதி செய்வதோடு, ஒரு பாரம்பரிய அரசுக்குச் சொந்தமான நிறுவனத்தை விட அதிக வணிக நெகிழ்வுத்தன்மையையும் செயல்பாட்டு சுதந்திரத்தையும் வழங்கும் ஒரு மாதிரியை நிறுவ வேண்டியதன் அவசியத்தையும் அமைச்சர் வலியுறுத்தினார்.
துறைமுகங்களில் தனியார் துறைப் பங்கேற்பை அறிமுகப்படுத்துவது, குறிப்பாகத் தொழிற்சங்கங்களுடன் இணைந்து செயல்படுவது மற்றும் பிற நாடுகளில் வருமானம் மற்றும் பணியாளர் நலனை மேம்படுத்திய, ஊழியர்களுக்குச் சாதகமான சீர்திருத்தங்களைச் செயல்படுத்துவது தொடர்பான சர்வதேச அனுபவங்களைப் பகிர்ந்துகொள்ளத் தயாராக இருப்பதாக உலக வங்கிப் பிரதிநிதிகள் தெரிவித்தனர்.
பங்களாதேஷின் சிட்டகாங் துறைமுகத்தின் வளர்ச்சியை ஒரு வெற்றிகரமான உதாரணமாகக் குறிப்பிட்ட அக்குழு, சிங்கப்பூர், துபாய் மற்றும் ஜெட்டாவைச் சேர்ந்த சர்வதேச துறைமுக இயக்குநர்களின் ஈடுபாடு, அத்துறைமுகத்தை எவ்வாறு மிகவும் திறமையான மற்றும் போட்டித்தன்மை வாய்ந்த கடல்சார் மையமாக மாற்ற உதவியது என்பதையும் விளக்கியது.
சிறிலங்கன் ஏர்லைன்ஸ் மற்றும் பரந்த விமானப் போக்குவரத்துத் துறையின் எதிர்கால மறுசீரமைப்பு குறித்தும் கவனம் ஈர்க்கப்பட்டது.
துறைமுகத் துறை மேம்பாட்டுடன் நாட்டின் விமானப் போக்குவரத்துத் துறையை வலுப்படுத்தும் நோக்கில், இந்த சீர்திருத்தங்கள் குறித்த கலந்துரையாடல்கள் சர்வதேச நிதிக் கூட்டுத்தாபனத்துடன் (IFC) மேற்கொள்ளப்பட்டு வருவதாக அமைச்சர் தெரிவித்தமை குறிப்பிடத்தக்கது.
| செய்திகளை உடனுக்குடன் தெரிந்து கொள்ள IBC தமிழ் WHATSAPP இல் இணைந்து கொள்ளுங்கள்...! |
புங்குடுதீவு 10ம் வட்டாரம், கிளிநொச்சி, Lützelflüh, Switzerland
21 May, 2026
அரியாலை, கொழும்பு, Georgetown, Guyana, Edgware, United Kingdom
17 Jun, 2025
புங்குடுதீவு 10ம் வட்டாரம், புங்குடுதீவு, கொழும்பு, Brampton, Canada
13 Jun, 2026
புங்குடுதீவு 10ம் வட்டாரம், Chur, Switzerland, Flums, Switzerland
16 May, 2026
