கடற்றொழிலாளர்களின் பிரச்சினைக்கு விரைவில் தீர்வு: ஜீவன் விடுத்த கோரிக்கை
கடற்றொழிலாளர்களின் பிரச்சினைக்கு விரைவில் நிலையானதொரு தீர்வை காணுமாறு இந்திய அரசிடமும், அதிபர் விக்ரமசிங்கவிடமும் கோரிக்கை விடுத்துள்ளதாக இலங்கை தொழிலாளர் காங்கிரஸின் பொதுச்செயலாளரும், நீர்வழங்கல் மற்றும் தோட்ட உட்கட்டமைப்பு அபிவிருத்தி அமைச்சருமான ஜீவன் தொண்டமான் தெரிவித்துள்ளார்.
யாழ்ப்பாணம் சிறைச்சாலையில் உள்ள 43 தமிழக கடற்றொளிலாளர்களை சந்தித்து அவர்களிடம் நலம் விசாரித்ததுடன், அவர்களுக்குள்ள பிரச்சினைகளையும் கேட்டறிந்து கொண்டுள்ளார்.
தொடர்ந்தும் செய்தியாளர்களிடம் கருத்து வெளியிட்ட அமைச்சர் ஜீவன், “யாழ்ப்பாணம் சிறையில் உள்ள 43 தமிழககடற்றொழிலாளர்களை சந்தித்தேன்.அவர்கள் ஏன் கைது செய்யப்பட்டுள்ளனர் என்பது பற்றி எடுத்து கூறினேன். அவர்களும் அதனை ஏற்றுக்கொண்டனர்.
வாழ்வாதாரம்
43 கடற்றொழிலாளர்களில் இருவர் கடத்தல் சம்பவத்துடன் தொடர்புபட்டுள்ளனர்.ஏனைய 41 கடற்றொழிலாளர்களுக்கும் இலங்கை அரசு மூலமாக அல்லது, எம்மால் முடிந்த உதவிகளை நிச்சயம் செய்வோம்.
இன்னும் இரண்டு அல்லது மூன்று வாரங்களுக்குள் அவர்கள் விடுதலை செய்யப்படுவார்கள் என நம்புகின்றேன். இலங்கை காவல்துறையினர் தம்மை நன்றாக நடத்துகின்றனர் என கடற்றொழிலாளர்கள் தெரிவித்தனர்.
வடக்கில் உள்ள கடற்றொழிலாளர்களும் தமிழர்கள், போரால் பாதிக்கப்பட்டவர்கள், சிறிய படகுகளை வைத்துக்கொண்டுதான் அவர்கள் தமது வாழ்க்கையை கொண்டு நடத்துகின்றனர், அவர்களின் வாழ்வாதாரம் பாதிக்கப்படக்கூடாது.
கோரிக்கை
தமிழக கடற்றொழிலாளர்கள் ரோலர் படகுகளைப் பயன்படுத்தி அதிகளவான மீன்களை பிடிக்கின்றனர், இலங்கை கடல் வளமும் சேதமடைகின்றது.
இது கடல்சார் சட்டங்களையும் மீறும் செயலாகும். கடற்றொழிலாளர்களின் பிரச்சினைக்கு விரைவில் தீர்வு காணுமாறு இந்திய அரசிடமும், இலங்கை அதிபருடனும் நாம் கோரிக்கை முன்வைத்துள்ளோம்”என்றார்.
செய்திகளை உடனுக்குடன் தெரிந்து கொள்ள IBC தமிழ் WHATSAPP இல் இணைந்து கொள்ளுங்கள்...! |
புங்குடுதீவு 3ம் வட்டாரம், Herzogenbuchsee, Switzerland, Toronto, Canada, கரவெட்டி
05 Oct, 2022
