ஷிரந்திக்கு எதிரான சிரிலிய விசாரணையின் அடுத்த பக்கங்கள்...

முன்னாள் ஜனாதிபதி மகிந்த ராஜபக்சவின் மனைவி ஷிரந்தி ராஜபக்ச தொடர்பானதாகக் கூறப்படும் நிதி முறைகேடுகள் மற்றும் ஏனைய விவகாரங்கள் குறித்த விசாரணைகள் தற்போது மீண்டும் தீவிரமடைந்துள்ள நிலையில், கடந்த காலங்களில் அவரைச் சுற்றி எழுப்பப்பட்ட பல்வேறு குற்றச்சாட்டுகளும் கவனம் பெற்றுள்ளன.

ஷிரந்தி ராஜபக்சவுடன் தொடர்புடையதாகக் கூறப்படும் ‘சிரிலிய’ வங்கிக் கணக்கு தொடர்பான நிதி முறைகேடு மற்றும் மகரகம அபேக்ஷா மருத்துவமனைக்கு PET ஸ்கேன் இயந்திரமொன்றை கொள்வனவு செய்வதற்காக நிதி திரட்டும் நடவடிக்கையை முன்னெடுத்தமை தொடர்பான விவகாரங்கள் தற்போதைய விசாரணைகளில் முக்கிய அம்சங்களாகக் குறிப்பிடப்படுகின்றன.

எனினும், இவற்றுக்கு அப்பால், ஷிரந்தி ராஜபக்ச தொடர்பில் கடந்த காலங்களில் பல்வேறு குற்றச்சாட்டுகள் மற்றும் சர்ச்சைக்குரிய விவகாரங்கள் முன்வைக்கப்பட்டுள்ளன.

222222222V என்ற அடையாள அட்டை எண்ணால் ஷிரந்தி தொடங்கிய வங்கி கணக்கு! தீவிரமாகும் விசாரணை

குற்றச்சாட்டுக்கள்

1. ‘தேசத்திற்கு மகுடம்’ கண்காட்சி தொடர்பான குற்றச்சாட்டு

2012–2013 காலப்பகுதியில் நாடு முழுவதும் நடைபெற்ற ‘தேசத்திற்கு மகுடம்’ கண்காட்சியுடன் தொடர்பாக பொதுநிதி முறைகேடாக பயன்படுத்தப்பட்டதாக குற்றச்சாட்டுகள் முன்வைக்கப்பட்டிருந்தன.

இந்த நிகழ்வுகளுக்காக ஒரு கோடி ரூபாய்க்கும் அதிகமான பொதுநிதி வீணடிக்கப்பட்டதாகவும், அது தொடர்பில் விசாரணைகள் இடம்பெற்றதாகவும் அக்காலத்தில் தகவல்கள் வெளியாகின.

2. ‘சிரிலிய சவிய’ நிதி தொடர்பான விவகாரம்

‘சிரிலிய சவிய’ அமைப்பின் நிதியைப் பயன்படுத்தி கொழும்பு டொரிங்டன் பகுதியில் வீடொன்று கொள்வனவு செய்யப்பட்டதாகக் கூறப்பட்ட விவகாரமும் கடந்த காலங்களில் சர்ச்சையை ஏற்படுத்தியது.

இந்த நிதி எவ்வாறு பயன்படுத்தப்பட்டது என்பது தொடர்பிலும் கேள்விகள் எழுப்பப்பட்டிருந்தன.

3. வரிவிலக்கில் இறக்குமதி செய்யப்பட்ட சொகுசுப் பேருந்துகள்

விளையாட்டுத்துறை அமைச்சின் பெயரில் வரிவிலக்குடன் இரண்டு சொகுசுப் பேருந்துகள் இறக்குமதி செய்யப்பட்டு, பின்னர் ஷிரந்தி ராஜபக்ச நிர்வகித்ததாகக் கூறப்படும் ‘கார்ல்டன்’ முன்பள்ளி வலையமைப்பின் நடவடிக்கைகளுக்குப் பயன்படுத்தப்பட்டதாகவும் குற்றச்சாட்டுகள் முன்வைக்கப்பட்டிருந்தன.

கஜ்ஜா கொலை வெளிவரும் திடுக்கிடும் தகவல்கள்

வசீம் தாஜுதீன் கொலை

அரச நிறுவனத்தின் பெயரில் வழங்கப்பட்ட வரிவிலக்கு எவ்வாறு பயன்படுத்தப்பட்டது என்பது தொடர்பிலும் அப்போது கேள்விகள் எழுந்தன.

4. வசீம் தாஜுதீன் கொலை வழக்குடன் தொடர்புபடுத்தப்பட்ட விவகாரம்

ரக்பி வீரர் வசீம் தாஜுதீன் உயிரிழந்த சம்பவத்திலும் ‘சிரிலிய சவிய’ அமைப்புடன் தொடர்புடையதாகக் கூறப்படும் டிஃபென்டர் வாகனம் தொடர்பில் விசாரணையாளர்களின் கவனம் சென்றிருந்ததாக முன்னதாக செய்திகள் வெளியாகியிருந்தன.

இந்த வாகனம் சம்பவத்துடன் எவ்வாறு தொடர்புபட்டது என்பது தொடர்பில் பல்வேறு தகவல்கள் அக்காலகட்டத்தில் வெளியாகின.

மேலும், மகிந்த ராஜபக்சவின் பாதுகாப்புப் பிரிவில் பணியாற்றியதாகக் கூறப்படும் ‘கஜ்ஜா’ என அறியப்பட்ட நபர் தொடர்பான சம்பவமும் ராஜபக்ச குடும்பத்தைச் சுற்றியிருந்த சர்ச்சைகளில் ஒன்றாகப் பேசப்பட்டது.

அவர் பின்னர் ஊடகங்களுக்கு வழங்கியதாகக் கூறப்படும் நேர்காணல்களும் அக்காலத்தில் பெரும் கவனத்தைப் பெற்றிருந்தன.

தீவிரமடையும் ஷிரந்திக்கு எதிரான சிரிலிய நிதி முறைகேடுகள் விசாரணை

விசாரணைகளில் முன்னிலையாக முடியாத நிலை

இந்நிலையில், ஷிரந்தி ராஜபக்ச தொடர்பான தற்போதைய விசாரணைகள் தனிப்பட்ட ஒரு வங்கி கணக்கு அல்லது ஒரு நிதி திரட்டும் நடவடிக்கையுடன் மட்டுப்படுத்தப்படுமா அல்லது கடந்த காலங்களில் முன்வைக்கப்பட்ட ஏனைய குற்றச்சாட்டுகள் தொடர்பிலும் விசாரணைகள் விரிவுபடுத்தப்படுமா என்பது குறித்து கவனம் திரும்பியுள்ளது.

குறிப்பாக, கடந்த காலங்களில் முன்வைக்கப்பட்ட குற்றச்சாட்டுகளில் எவை தொடர்பாக அதிகாரப்பூர்வ விசாரணைகள் நடத்தப்பட்டன, அவற்றின் முடிவுகள் என்ன, எந்த விவகாரங்கள் இன்னும் விசாரணை நிலையில் உள்ளன என்பவை முக்கிய கேள்விகளாக உள்ளன.

ஷிரந்தி ராஜபக்ச தற்போது மருத்துவ காரணங்களால் விசாரணைகளில் நேரடியாக முன்னிலையாக முடியாத நிலை ஏற்பட்டுள்ளதாக சில தகவல்கள் தெரிவிக்கின்றன.

ராஜபக்ச குடும்பத்தைச் சுற்றியுள்ள பழைய விவகாரங்கள் மீண்டும் கவனத்தில் ராஜபக்ச குடும்பத்தைச் சேர்ந்த பலருக்கு எதிரான பழைய நிதி மற்றும் நிர்வாக குற்றச்சாட்டுகள் மீண்டும் விசாரணைக்கு உட்படுத்தப்படுகின்றன என்ற பின்னணியில், ஷிரந்தி ராஜபக்ச தொடர்பான நடவடிக்கையும் அரசியல் மற்றும் சட்ட ரீதியாக முக்கியத்துவம் பெற்றுள்ளது.

இதுவரை முன்வைக்கப்பட்ட குற்றச்சாட்டுகளில் எவை நீதிமன்றத்தில் நிரூபிக்கப்பட்டுள்ளன, எவை விசாரணை மட்டத்தில் உள்ளன, எவை ஆதாரமின்மையால் முடிவுக்கு வந்துள்ளன என்பவற்றை வேறுபடுத்திப் பார்ப்பது அவசியமாகிறது.

தற்போதைய விசாரணைகள் எவ்வாறு முன்னேறுகின்றன என்பதையும், குற்றச்சாட்டுகள் தொடர்பில் சட்ட அமுலாக்க நிறுவனங்கள் என்ன நடவடிக்கைகளை எடுக்கின்றன என்பதையும் பொறுத்தே அடுத்தகட்ட நிலை தெளிவாகும்.