5 கொலைகள்: பிள்ளையான் உள்ளிட்ட மூவருக்கு விளக்கமறியல் நீடிப்பு

Batticaloa Pillayan Sri Lanka Magistrate Court

By Sindu Nov 10, 2026 07:13 AM GMT

Sindu

in சமூகம்

Report

பிள்ளையான் எனப்படும் முன்னாள் இராஜாங்க அமைச்சர் சிவனேசதுரை சந்திரகாந்தன் உட்பட 3 பேரை எதிர்வரும் 23ஆம் திகதி வரை மீண்டும் விளக்கமறியலில் வைக்குமாறு மட்டக்களப்பு நீதவான் உத்தரவிட்டுள்ளார்.

2008ஆம் ஆண்டு காவல் உத்தியோகத்தர் ஒருவர் உட்பட இருவர் சுட்டுக்கொலை, தமிழ் மக்கள் விடுதலைப் புலிகள் (TMVP) கட்சியின் உறுப்பினர் உட்பட இருவர் சுட்டுக்கொலை, மற்றும் வர்த்தகர் ஒருவர் கடத்தப்பட்டு கொடூரமாகக் கொலை செய்யப்பட்டமை ஆகிய மூன்று சம்பவங்களுக்காக இவர் கைது செய்யப்பட்டிருந்தார்.

இக் கொலைகள் தொடர்பில் பிள்ளையான் மற்றும் காத்தான்குடியைச் சேர்ந்த இராணுவப் புலனாய்வுப் பிரிவின் தகவலாளிகளான மொஹமட் சிபான், மொஹமட் சகீத் ஆகியோரை கடந்த 2025 நவம்பர் மாதம் குற்றப்புலனாய்வுத் துறையினர் (CID) கைது செய்தனர்.

தொடர் விளக்கமறியல்

இந்த 5 முக்கிய மனிதக் கொலைகள் தொடர்பாகப் பிள்ளையான், இராணுவப் புலனாய்வுப் பிரிவின் தகவலாளிகள் மற்றும் லண்டனில் உள்ள காத்தான்குடியைச் சேர்ந்த மொஹமட் பாய்ஸ் உட்பட 4 பேருக்கு எதிராக மட்டக்களப்பு நீதவான் நீதிமன்றில் கடந்த 2026 ஜூன் 17ஆம் திகதி CIDயினர் வழக்குத் தாக்கல் செய்தனர்.

5 கொலைகள்: பிள்ளையான் உள்ளிட்ட மூவருக்கு விளக்கமறியல் நீடிப்பு | Pillayaan Further Remanded

அவர்களை நீதிமன்றில் முன்னிலைப்படுத்தியதைத் தொடர்ந்து, அவர்கள் தொடர்ச்சியாக விளக்கமறியலில் வைக்கப்பட்டு வருகின்றனர்.

இந்நிலையில், குறித்த வழக்கு விசாரணை இன்று (10) திறந்த நீதிமன்றில் விசாரணைக்கு எடுத்துக்கொள்ளப்பட்ட போது, விளக்கமறியலில் வைக்கப்பட்டிருந்த சந்தேகநபர்களான இராணுவப் புலனாய்வுப் பிரிவின் தகவலாளிகள் மொஹமட் சிபான், மொஹமட் சகீத் ஆகியோர் நேரில் முன்னிலைப்படுத்தப்பட்டதோடு, பிள்ளையான் காணொளி மூலமாக முன்னிலைப்படுத்தப்பட்டார்.

இதனைத் தொடர்ந்து பிள்ளையான் உட்பட 3 பேரையும் எதிர்வரும் 23ஆம் திகதி வரை மீண்டும் விளக்கமறியலில் வைக்குமாறு உத்தரவிட்ட நீதவான், லண்டனில் தலைமறைவாக உள்ள சந்தேகநபரான 'பொலிஸ் பாயிஸ்' என்றழைக்கப்படும் மொஹமட் பாய்ஸுக்கு எதிரான திறந்த பிடியாணையை தொடர்ந்து நீடித்து உத்தரவிட்டார்.