மூவர் சுட்டுக்கொலை : இருவரை கைது செய்ய பொதுமக்களிடம் உதவி கோரும் காவல்துறை

கடந்த செப்டம்பர் மாதம் பத்தேகமவில் மூன்று பேர் சுட்டுக் கொல்லப்பட்ட சம்பவத்துடன் தொடர்புடைய இரு சந்தேக நபர்களைக் கைது செய்ய, காவல்துறையினர் பொதுமக்களின் உதவியை நாடியுள்ளனர்

காவல்துறையின் தகவல்படி, கடந்த செப்டம்பர் 27 அன்று, கார் ஒன்றில் வந்த இருவர், முச்சக்கர வண்டியில் பயணித்துக்கொண்டிருந்த ஒரு ஆண் மற்றும் இரு பெண்களை நோக்கி 'ரி-56' (T-56) ரக துப்பாக்கியால் சுட்டுள்ளனர்.

இருப்பிடத்திலிருந்து தப்பிச்சென்ற சந்தேக நபர்கள்

பத்தேகம காவல்துறையினர் மற்றும் எல்பிட்டிய கோட்ட குற்றப்புலனாய்வுப் பிரிவு மேற்கொண்ட விசாரணைகளின் மூலம், இந்த துப்பாக்கிச் சூட்டுச் சம்பவத்துடன் தொடர்புடையவர்கள் மற்றும் குற்றத்திற்கு உடந்தையாக இருந்தவர்கள் என இரு சந்தேக நபர்கள் அடையாளம் காணப்பட்டுள்ளனர்.

இந்தச் சந்தேக நபர்கள் அப்பகுதியிலிருந்து தப்பிச் சென்றுள்ளதாகவும், இன்னும் கைது செய்யப்படவில்லை என்றும் காவல்துறையினர் தெரிவித்தனர்.

தேடப்படும் சந்தேக நபர்கள் பின்வருமாறு அடையாளம் காணப்பட்டுள்ளனர்:

லத்து கொலித யசரத்ன டி சொய்சா (50) – கெகில்ல மண்டிய, பூஸா பகுதியைச் சேர்ந்தவர்.

வத்துதுர புத்தி மதுசங்க குணசிறி (35) –ராஜாஹெனவத்த, சுதுமெட்டிய, தொடந்துவ பகுதியைச் சேர்ந்தவர்.

இவர்கள் இருக்கும் இடம் குறித்த தகவல் தெரிந்தவர்கள், பின்வரும் தொலைபேசி எண்களுக்குத் தொடர்புகொண்டு அறிவிக்குமாறு காவல்துறையினர் கேட்டுக்கொண்டுள்ளனர்:

பொறுப்பதிகாரி (OIC), பத்தேகம காவல் நிலையம்: 071-8591480

பத்தேகம காவல் நிலையம்: 091-2292222

இது குறித்த மேலதிக விசாரணைகள் நடைபெற்று வருகின்றன.