வைத்தியசாலையில் மகிந்த! நீதிமன்றில் முன்னிலைப்படுத்தப்படவுள்ள ஷிரந்தி

Mahinda Rajapaksa Shiranthi Rajapaksa CIABOC

By Sathangani Oct 13, 2026 03:38 AM GMT

Sathangani

Report

முன்னாள் ஜனாதிபதி மகிந்த ராஜபக்சவின் மனைவியான ஷிரந்தி ராஜபக்ச, கொழும்பு தேசிய வைத்தியசாலையின் இருதய சிகிச்சை பிரிவில் தற்போது சிகிச்சை பெற்று வரும் நிலையில் இன்று (13) நீதிமன்றத்தில் முன்னிலைப்படுத்தப்படவுள்ளார்.

அரச வங்கி ஒன்றிலிருந்து பெறப்பட்ட 10 மில்லியன் ரூபாயை முறைகேடாகப் பயன்படுத்தியதாகக் கூறப்படும் ஊழல் மற்றும் பொதுச் சொத்துச் சட்டத்தின் கீழான குற்றச்சாட்டுகளின் பேரில் ஷிரந்தி ராஜபக்ச கடந்த 7 ஆம் திகதி கைது செய்யப்பட்டார்.

அன்றையதினம் கொழும்பு பிரதான நீதவான் நீதிமன்றத்தில் முன்னிலைபடுத்தப்பட்டதைத் தொடர்ந்து, அவர் இன்று வரை விளக்கமறியலில் வைக்கப்பட்டார்.

கொழும்பு தேசிய வைத்தியசாலை

சிறைச்சாலை வைத்தியசாலையின் மருத்துவப் பரிந்துரைகளின் அடிப்படையில், அவர் தற்போது கொழும்பு தேசிய வைத்தியசாலையில் சிகிச்சை பெற்று வருவதாக சிறைச்சாலைகள் பேச்சாளர் சேனக பல்லேத்தன்ன தெரிவித்தார்.

வைத்தியசாலையில் மகிந்த! நீதிமன்றில் முன்னிலைப்படுத்தப்படவுள்ள ஷிரந்தி | Shiranthi Rajapaksa To Be Produced Before Court

மருத்துவ ஆலோசனையின் காரணமாக ஷிரந்தி ராஜபக்சவை இன்று நீதிமன்றத்தில் முன்னிலைப்படுத்த முடியாத சூழல் ஏற்பட்டால், அது தொடர்பான மருத்துவ அறிக்கை நீதிமன்றத்தில் சமர்ப்பிக்கப்படும் என்றும் ஊடகப் பேச்சாளர் குறிப்பிட்டார்.

நிதி குற்றப் புலனாய்வு பிரிவு

இதேவேளை, 2010 ஆம் ஆண்டில் 'லேடி ரிட்ஜ்வே சிறுவர் மருத்துவமனைக்கு சி.டி. ஸ்கானர் (CT scanner) ஒன்றை வாங்குவதற்காக என்று கூறி ஷிரந்தி ராஜபக்ச விடுத்த எழுத்துப்பூர்வ கோரிக்கையைத் தொடர்ந்து, தேசிய சேமிப்பு வங்கியால் சிரிலிய சவிய கணக்கில் வரவு வைக்கப்பட்ட 10 மில்லியன் ரூபாயை குற்றவியல் ரீதியாக முறைகேடாகப் பயன்படுத்தியது தொடர்பாகவும் அவர் மீது விசாரணை நடைபெற்று வருகிறது.

இதற்கிடையில், அந்தச் சம்பவம் தொடர்பாக நிதி குற்றப் புலனாய்வு பிரிவினால் தான் கைது செய்யப்பட்டால் தன்னை முன்பிணையில் விடுவிக்குமாறு கோரி ஷிரந்தி ராஜபக்ச தாக்கல் செய்திருந்த முன்பிணை மனுவை மாளிகாகந்த நீதவான் நீதிமன்றம் நேற்று (12) நிராகரித்திருந்தது.

முன்னாள் ஜனாதிபதி மகிந்த ராஜபக்சவும் நேற்று (12) காலை கொழும்பிலுள்ள தனியார் வைத்தியசாலையில் அனுமதிக்கப்பட்டு, தொடர்ந்து சிகிச்சை பெற்று வருகின்றமை குறிப்பிடத்தக்கது.