கோட்டாபயவின் வீடு முற்றுகையிடப்படும்- விடுக்கப்பட்டது எச்சரிக்கை!

india colombo sri lanka protest gotabaya shanakyan fisher man

By Kalaimathy Feb 23, 2022 11:42 AM GMT

Kalaimathy

in இலங்கை

Report

இந்திய மீனவர்களின் அத்துமீறலுக்கு எதிராக யாழ்ப்பாணத்தில் போராட்டத்தில் ஈடுபட்ட மீனவர்கள் இன்று கொழும்பில் போராட்டத்தில் ஈடுபட்டிருந்தனர்.

இதன் போது தமிழ்த் தேசியக் கூட்டமைப்பின் நாடாளுமன்ற உறுப்பினர் இரா.சாணக்கியனும் பங்கேற்றிருந்தார். அதேவேளை தமிழ்த்தேசிய கூட்டமைப்பு மீனவர்களின் போராட்டங்களுக்கு என்றும் ஆதரவாக செயற்படும் எனவும் தெரிவித்துள்ளார்.

கொழும்பு கோட்டை ரயில் நிலையத்திற்கு முன்பாக மீனவர்களுக்கு ஆதரவாக இன்று முன்னெடுக்கப்பட்ட போராட்டத்தில் கலந்து கொண்டு ஊடகங்களுக்கு கருத்து வெளியிடும் போதே அவர் இவ்வாறு தெரிவித்துள்ளார்.

இதன்போது தொடர்ந்தும் கருத்து வெளியிட்ட அவர்,

வட பகுதி மீனவர்களின் பிரச்சனைகளுக்கு அரசாங்கம் தீர்வினை பெற்றுதர தவறினால் அரச தலைவரின் அலுவலகத்தினையோ அல்லது அவரின் இல்லத்தினையோ முற்றுகையிட்டு போராட்டம் முன்னெடுக்கப்படும் என எச்சரிக்கை விடுத்துள்ளார்.

மேலும் அமைச்சர் டக்ளஸ் தேவானந்தாவினால் வினைதிறனாக செயற்பட முடியாவிட்டால் அவர் பதவி விலக வேண்டும் என நான் பலமுறை கூறிவருகின்றேன்.

அமைச்சர் டக்ளஸ் தேவானந்தா வினைத்திறனாக செயற்படாமையினாலேயே இன்று இலங்கை – இந்திய மீனவர்களுக்கிடையிலான போராட்டம் பூதாகரமாக மாறியுள்ளது.

தமிழக மக்கள் மத்தியில் தமிழ் மக்களுக்கு உள்ள அனுதாப உணர்வினை மாற்றும் வகையிலேயே அமைச்சர் டக்ளஸ் தேவானந்தாவின் செயற்பாடுகள் அமைந்துள்ளன.

அவர் அரசாங்கத்தின் கைகூலியாக செயற்படுவதனை விட்டு விட்டு மீனவர்களின் பிரச்சனைகளுக்கு தீர்வினை பெற்றுக்கொடுக்க நடவடிக்கை எடுக்க வேண்டும்.

அவ்வாறு தீர்வினை பெற்றுத்தர அரசாங்கம் தவறினால் போராட்ட வடிவம் மாற்றம்பெறும், குறிப்பாக அரசதலைவர் அலுவலகத்தினையோ அல்லது இல்லத்தினையோ முற்றுகையிட்டு போராட்டம் முன்னெடுக்கப்படும் என எச்சரிக்கை விடுத்துள்ளார்.