ரணிலின் பாதுகாப்பு அதிகாரி - கேமரா கலைஞர் மோதல்: நடுநிலையான விசாரணைக்கு கோரிக்கை

Ranil Wickremesinghe Sri Lanka Sri Lanka Police Investigation

By Shalini Balachandran Oct 02, 2026 06:22 AM GMT

Shalini Balachandran

in அரசியல்

Report

முன்னாள் ஜனாதிபதி ரணில் விக்ரமசிங்கவின் பாதுகாப்புப் படை அதிகாரி ஒருவருக்கும் ஊடக நிறுவனத்தைப் பிரதிநிதித்துவப்படுத்திய கேமரா கலைஞர் ஒருவருக்கும் இடையில் இடம்பெற்றதாகக் கூறப்படும் சம்பவம் தொடர்பில் நியாயமான நடுநிலையான மற்றும் விரைவான விசாரணைகளுக்கு கோரிக்கை விடுக்கப்பட்டுள்ளது.

சுதந்திர ஊடக இயக்கம் (Free Media Movement) அதிகாரிகளிடம் இந்த கோரிக்கையை விடுத்துள்ளது.

சுதந்திர ஊடக இயக்கத்தின் பதில் அமைப்பாளரும் செயலாளருமான திலீஷா அபேசுந்தரவின் (Dilisha Abeysundara) கையொப்பத்துடன் வெளியிடப்பட்டுள்ள ஊடக அறிக்கையிலேயே இக்கோரிக்கை விடுக்கப்பட்டுள்ளது.

சர்ச்சைமிக்க சம்பவம்

கடந்த செப்டம்பர் 30 ஆம் திகதி கொழும்பு கோட்டை நீதிவான் நீதிமன்றத்தில் இருந்து ரணில் விக்ரமசிங்க வெளியேறிய போது அவரது பாதுகாப்பு அதிகாரிக்கும் கேமரா கலைஞருக்கும் இடையே இந்தச் சர்ச்சைமிக்க சம்பவம் இடம்பெற்றது.

ரணிலின் பாதுகாப்பு அதிகாரி - கேமரா கலைஞர் மோதல்: நடுநிலையான விசாரணைக்கு கோரிக்கை | Fmm Urges Probe Into Ranil Guard Cameraman Clash

இந்த தாக்குதலுக்கு இலக்கானதாகக் கூறப்படும் பாதுகாப்பு அதிகாரி கொழும்பு தேசிய மருத்துவமனையில் அனுமதிக்கப்பட்டதுடன், கொம்பனித்தெரு காவல் நிலையத்தில் முறைப்பாடு செய்திருந்தார்.

அதனைத் தொடர்ந்து, வாக்குமூலம் பெறுவதற்காக அழைக்கப்பட்ட குறித்த ஊடகவியலாளர் கொம்பனித்தெரு காவல்துறையினரால் கைது செய்யப்பட்டுள்ளதை காவல்துறை ஊடகப் பேச்சாளர் உறுதிப்படுத்தி இருந்தார்.

பாதுகாப்பு அதிகாரிகள்

இந்தநிலையில் விஐபி (VIP) பாதுகாப்பு அதிகாரிகள் நபர் ஒருவரின் அல்லது இடத்தின் பாதுகாப்பை உறுதிசெய்யும் கடமையைக் கொண்டிருப்பது போல பொதுமக்களின் தகவல் அறியும் உரிமையைப் பாதுகாப்பதற்காக ஊடகவியலாளர்களுக்கும் விசேட கடமைப் பொறுப்பு உள்ளது என சுதந்திர ஊடக இயக்கம் சுட்டிக்காட்டியுள்ளது.

எனவே, இரு தரப்பினரும் பரஸ்பர புரிதலுடனும் ஒருவருக்கொருவர் தொழில்முறை கண்ணியத்தைப் பேணும் வகையிலும் செயல்படுவது அத்தியாவசியமானது என அவ்வறிக்கையில் குறிப்பிடப்பட்டுள்ளது.

ஊடகவியலாளர் ஒருவரைக் இலக்கு வைத்து முன்வைக்கப்படும் குற்றச்சாட்டுகளைச் சாதாரணமானதாகக் கருத முடியாது என்றும் இரு தரப்பினரின் தொழில்முறைப் பின்னணி காரணமாக சமூகத்தின் கவனம் இதன் மீது திரும்பியுள்ளதாகவும் சுட்டிக்காட்டப்பட்டுள்ளது.

எனவே, உண்மையான தகவல்களை உடனடியாக வெளிக்கொண்டுவரும் வகையில் நியாயமான மற்றும் விரைவான விசாரணைகளை நடத்துமாறு அவ்வமைப்பு கேட்டுக்கொண்டுள்ளமை குறிப்பிடத்தக்கது.