விடுதலை வேட்கையில் வேரூன்றி நின்ற அண்ணன் சிவாஜிலிங்கத்தின் மறைவு பேரிழப்பாகும்:பாஸ்கரன் கந்தையா

தமிழ்த் தேசிய இனத்தின் விடுதலை வேட்கையில் ஆழமாக வேரூன்றி நின்ற அண்ணன் சிவாஜிலிங்கம் அவர்களின் மறைவு, எமது இனத்திற்கு ஈடுசெய்ய முடியாத பேரிழப்பாகும் என பாஸ்கரன் கந்தையா தெரிவித்துள்ளார்.

தமிழீழ விடுதலை இயக்கத்தின் ஆரம்பகால உறுப்பினராகத் தன் அரசியல் வாழ்வைத் தொடங்கிய அவர், 2001 முதல் 2010 வரை யாழ்ப்பாண மாவட்டத்தின் நாடாளுமன்ற உறுப்பினராகப் பணியாற்றினார்.

2013ஆம் ஆண்டு வடமாகாண சபை உறுப்பினராகத் தெரிவானபோது, இறுதிப் போர் நடந்த முள்ளிவாய்க்கால் மண்ணிலேயே பதவிப் பிரமாணம் எடுத்தார்.

2010, 2019 ஆகிய ஆண்டுகளில் ஜனாதிபதித் தேர்தலில் போட்டியிட்டு, தமிழர் தரப்பின் கோரிக்கைகளைத் தேசிய அரங்கில் உரத்து ஒலித்தார். இறுதியாக வல்வெட்டித்துறை நகர சபையின் தவிசாளராகப் பொறுப்பேற்றுத் தன் மண்ணின் மக்களுக்குப் பணியாற்றினார்.

பதவிகளைவிட, அவர் வாழ்ந்த விதமே அவரை அடையாளப்படுத்தியது. தன் வாழ்நாள் முழுவதையும் தமிழ்த் தேசத்தின் விடுதலைக்காகவும், தமிழ் மக்களின் அரசியல் விடிவுக்காகவும் அர்ப்பணித்தவர் அவர்.

தமிழர் தாயகத்தின் மீது சிங்கள தேசம் மேற்கொண்ட அடக்குமுறைகளுக்கு எதிராக எவ்வித அச்சமும் இன்றிக் குரல் கொடுத்தவர். போர்க்குற்றங்களுக்குச் சர்வதேச விசாரணை வேண்டும் என்று பல ஆண்டுகளாக வெளிப்படையாக வலியுறுத்தியவர். பலரும் அச்சத்தில் ஒதுங்கியிருந்த காலப்பகுதியில் நினைவேந்தல்களைத் துணிவோடு முன்னெடுத்தவர்.

நோயோடு போராடிய இறுதி நாட்கள் வரை, இந்த இனத்தின் அரசியல் விடிவே தன் ஒரே குறிக்கோள் என்பதிலிருந்து அவர் விலகவில்லை. தமிழ்த் தேசிய இனத்தின் அரசியல் ஆன்மாவில் அவர் ஆற்றிய பங்கை, அவர் வகித்த பதவிகளால் அளவிட முடியாது.

தனித்து நிற்க நேர்ந்த வேளைகளிலும் தன் நிலைப்பாட்டை விட்டுக்கொடுக்காமல், நீதிக்கான கோரிக்கையும் உயிர்நீத்தவர்களுக்கான நினைவும் மறக்கடிக்கப்படாமல் காத்த சிலரில் அவரும் ஒருவர். அத்தகைய ஒருவரின் இழப்பு, இந்த இனத்திற்கு அரசியல் ரீதியாகவும் ஆழமான வெற்றிடத்தை ஏற்படுத்தியுள்ளது.

இன்று நாம் உணர வேண்டிய இன்னொரு கசப்பான உண்மையும் உண்டு. நம் தேசத்தையும் தேசிய இனத்தையும் உளமார நேசிக்கும், எஞ்சியிருக்கும் பற்றாளர்களை நாம் தொடர்ச்சியாக இழந்துகொண்டிருக்கிறோம். இந்த இழப்புகள் இப்போது முடிவற்ற தொடர்கதையாகி வருகின்றன.

இந்நிலையில், தமிழ்த் தேசிய இனம் தன் அரசியல் அடைவுகளை எட்டுவதற்கும், அதற்கான ஒழுங்கமைந்த பாதையில் உறுதியோடு பயணிப்பதற்கும் இன்று எந்த அளவு வலிமை பெற்றிருக்கிறது என்ற கேள்வி நம் முன்னே நிற்கிறது. அண்ணன் சிவாஜிலிங்கம் போன்றோரின் தியாகத்திற்கும் உழைப்பிற்கும் நாம் செலுத்தும் உண்மையான அஞ்சலி, இந்தக் கேள்விக்குச் செயலால் விடை தருவதே ஆகும்.

அவர் சுமந்த கனவைத் தொடர்ந்து சுமப்போம். அவர் காட்டிய உறுதியை நம் வழிகாட்டியாகக் கொள்வோம். அண்ணனின் பிரிவால் துயருறும் அவரது குடும்பத்தினருக்கும், உறவினர்களுக்கும், தோழர்களுக்கும், ஒட்டுமொத்த தமிழ்த் தேசிய உலகிற்கும் எமது ஆழ்ந்த இரங்கலைத் தெரிவித்துக் கொள்கிறோம்.

தமிழ்த் தேசிய அரசியலின் துணிச்சலான குரல் ஓய்ந்தது! சிவாஜிலிங்கம் நள்ளிரவு காலமானார்

வவுனியாவில் இடம்பெற்ற மாவீரர்களின் பெற்றோர்களுக்கு மதிப்பளிக்கும் நிகழ்வு!