மாபெரும் டொலர் பரிமாற்ற மோசடி! 17 நிறுவனங்கள் மீது FCID விசாரணை

பொருட்களை இறக்குமதி செய்வதாகக் கூறி சட்டவிரோதமான முறையில் அமெரிக்க டொலர்களை வெளிநாடுகளுக்கு மாற்றியதாக சந்தேகிக்கப்படும் மேலும் 17 நிறுவனங்கள் தொடர்பில் விரிவான விசாரணையை இலங்கை காவல்துறை நிதிக் குற்ற விசாரணைப் பிரிவு (FCID) ஆரம்பித்துள்ளது.

இந்த 17 நிறுவனங்களும் ஒன்று அல்லது இரண்டு நபர்களால் இயக்கப்பட்டிருக்கலாம் என விசாரணையாளர்கள் சந்தேகிக்கின்றனர்.

இது தொடர்பான விசாரணைகள், வெளிநாடுகளில் இருந்து பொருட்களை இறக்குமதி செய்வதாகக் கூறி பல நிறுவனங்கள் பெருமளவு பணத்தை வெளிநாடுகளுக்கு மாற்றுவதாக இலங்கை சுங்கத் திணைக்களம் FCID-யிடம் செய்த முறைப்பாட்டைத் தொடர்ந்து ஆரம்பிக்கப்பட்டன.

2 ட்ரில்லியனை கடந்த உள்நாட்டு இறைவரித் திணைக்களத்தின் வருமானம்!

சட்டவிரோத நடவடிக்கை

விசாரணைகளில் கிடைத்த தகவல்களின் அடிப்படையில், இதேபோன்ற சட்டவிரோத நடவடிக்கைகளில் ஈடுபட்டதாகக் கூறப்படும் 72 நிறுவனங்களை இயக்கிய இரண்டு நபர்கள் கைது செய்யப்பட்டு விளக்கமறியலில் வைக்கப்பட்டுள்ளனர்.

இதன் தொடர்ச்சியாக, அதே முறையில் செயற்பட்டதாக சந்தேகிக்கப்படும் மேலும் 17 நிறுவனங்கள் தொடர்பில் தற்போது விரிவான விசாரணைகள் முன்னெடுக்கப்பட்டு வருகின்றன.

இந்த நிறுவனங்களை இயக்கியதாக சந்தேகிக்கப்படும் நபர்களை அடையாளம் காணும் நடவடிக்கைகள் இடம்பெற்று வருவதுடன், அவர்களை கைது செய்வதற்கான நடவடிக்கைகளும் மேற்கொள்ளப்படும் என FCID தெரிவித்துள்ளது.

2023 ஜனவரி 1ஆம் திகதி முதல் 2025 செப்டம்பர் 30ஆம் திகதி வரையான காலப்பகுதியில், ஏற்கனவே சட்ட நடவடிக்கை எடுக்கப்பட்டுள்ள 72 நிறுவனங்களும் தற்போது விசாரணைக்கு உட்படுத்தப்பட்டுள்ள 17 நிறுவனங்களும் இணைந்து மொத்தமாக ரூ.190 பில்லியன் பெறுமதியான அமெரிக்க டொலர்களை வெளிநாடுகளுக்கு மாற்றியுள்ளதாக விசாரணைகளில் தெரியவந்துள்ளது.

இதில், ஏற்கனவே சட்ட நடவடிக்கை எடுக்கப்பட்டுள்ள 72 நிறுவனங்கள் மாத்திரம் ரூ.130 பில்லியனை வெளிநாடுகளுக்கு மாற்றியுள்ளதாக தெரிவிக்கப்பட்டுள்ளது.

இந்தப் பணப்பரிமாற்றங்கள் கொழும்பில் அமைந்துள்ள ஆறு தனியார் மற்றும் அரச வங்கிகள் ஊடாக மேற்கொள்ளப்பட்டுள்ளதாக விசாரணையாளர்கள் தெரிவித்துள்ளனர்.

மின்சாரக் கட்டண குறைப்பு! எரிசக்தி அமைச்சின் விசேட நடவடிக்கை

மாற்றப்பட்ட பெரும்பாலான பணம்

விசாரணைகளில் கைது செய்யப்பட்ட சந்தேகநபர்கள், பணச்சலவை தொடர்பில் அதிக ஆபத்துள்ள நாடுகளாக அடையாளப்படுத்தப்பட்டுள்ள சில நாடுகளுக்கு பெருமளவு பணத்தை மாற்றியிருப்பது குறிப்பிடத்தக்க விடயமாக இருப்பதாக அதிகாரிகள் தெரிவித்துள்ளனர்.

பிரேசில், பனாமா, மொரீஷியஸ் மற்றும் மடகாஸ்கர் ஆகிய நாடுகளுக்கு பணம் மாற்றப்பட்டுள்ளதாக தெரிவிக்கப்பட்டுள்ளது.

இந்த நாடுகள் பணச்சலவை தொடர்பில் அதிக ஆபத்துள்ள பிராந்தியங்களாக அடையாளப்படுத்தப்பட்டுள்ளதாக விசாரணையாளர்கள் கூறுகின்றனர்.

மேலும், இந்தப் பணப்பரிமாற்றங்கள் இடம்பெற்ற பின்னர், குறித்த நாடுகளில் இருந்து இலங்கைக்கு எந்தவொரு பொருட்களும் இறக்குமதி செய்யப்பட்டதற்கான ஆதாரங்கள் கிடைக்கவில்லை எனவும் விசாரணைகளில் தெரியவந்துள்ளது.

இதனால், வெளிநாடுகளுக்கு மாற்றப்பட்ட பெரும்பாலான பணம் சட்டவிரோதமான வழிகளில் ஈட்டப்பட்டிருக்கலாம் என FCID சந்தேகிக்கிறது.