சர்வதேச ரீதியில் தங்கம் வென்ற முல்லைத்தீவு வீரமங்கைக்கு அடங்காமை திரைப்படக்குழு வழங்கிய கௌரவம் (VIDEO)
பாகிஸ்தானில் இடம்பெற்ற சர்வதேச குத்துச்சண்டை போட்டியில் இலங்கை சார்பில் பங்குப்பற்றிய முல்லைத்தீவினை சேர்ந்த யுவதி கணேஷ் இந்துகாதேவி தங்கப்பதக்கம் வென்று சாதனை படைத்துள்ளார்.
பாகிஸ்தான் - லாகூரில் இடம்பெற்ற சர்வதேச குத்துச்சண்டை போட்டியில், 25 வயதுக்குட்பட்ட 50_ 55 கிலோகிராம் எடைப்பிரிவுப் போட்டியில் குறித்த யுவதி பங்குப்பற்றி தங்கப்பதக்கம் வென்று எமது மண்ணிற்கு பெருமை சேர்த்துள்ளார்.
தந்தையை இழந்த நிலையில் தாயின் அரவணைப்பில் வாழ்ந்துவரும் இவர் தனது திறமை மீது கொண்ட நம்பிக்கையை உரமாக்கி இன்று இச்சாதனையை படைத்து நாட்டுக்கும், முல்லைத்தீவு மண்ணுக்கும் பெருமை சேர்த்துள்ளார்.
குறித்த யுவதிக்கு தென்னிந்திய முழு நீளத்திரைப்படமான ‘‘அடங்காமை’’ திரைப்படத்தின் ( வோர்ஸ் பிக்சர்ஸ் ) தயாரிப்பு குழுவான பொன்புலேந்திரன், மைக்கேல் ஜான்சன், கதாநாயகன் சரோன் ஆகியோர் இணைந்து, யுவதியின் இல்லத்திற்கு சென்று வாழ்த்தி ஒரு லட்சம் ரூபா (100,000 ) பணப்பரிசினை வழங்கி கௌரவித்துள்ளதுடன்,அடங்காமை திரைப்படகுழு சார்பாக வாழ்த்துக்களையும் தெரிவித்துள்ளனர்.
இலங்கை - யாழ்ப்பாணத்தை சேர்ந்த ( வோர்ஸ் பிக்சர்ஸ் ) தயாரிப்பாளர்களான பொன்புலேந்திரன், மைக்கேல் ஜான்சன்,கதாநாயகன் சரோன் ஆகியோரின் சிறந்த படைப்புடன்,இம்மாதம் ( ஜனவரி 28ம் திகதி ) இலங்கை திரையரங்குகளில் தென்னிந்திய முழு நீளத்திரைப்படமான அடங்காமை திரைப்படம் வெளியாகவுள்ளமை குறிப்பிடத்தக்கது.