முள்ளிவாய்க்கால் இனப்படுகொலை: கனடாவின் கருத்தை முற்றாக நிராகரித்த இலங்கை அரசாங்கம்
இலங்கையில் தமிழர்களுக்கு எதிராக இடம்பெற்ற யுத்தத்தை இனப்படுகொலை என கனடா பிரதமர் ஜஸ்டின் ட்ரூடோ மீண்டும் குறிப்பிட்டுள்ளதை வன்மையாக கண்டிப்பதாக சிறிலங்கா அரசாங்கம் தெரிவித்துள்ளது.
முள்ளிவாய்க்கால் நினைவேந்தலை முன்னிட்டு கடந்த சனிக்கிழமை ஜஸ்டின் ட்ரூடோ வெளியிட்ட அறிக்கையில், இனப்படுகொலை தொடர்பில் முன்வைத்த கருத்துக்கள் தவறான குற்றச்சாட்டுக்கள் என சிறிலங்கா வெளிவிவகார அமைச்சு இன்று வெளியிட்டுள்ள அறிக்கையில் சுட்டிக்காட்டியுள்ளது.
தமிழர்களுக்கு எதிரான போர் நிறைவடைந்த மே 18 ஆம் திகதியை தமிழர்கள் இனப்படுகொலை நினைவேந்தல் தினமாக அங்கீகரிப்பதற்கான தீர்மானத்திற்கு இரண்டு வருடங்களுக்கு முன்னர், கனடா நாடாளுமன்றம் ஏகமனதாக வாக்களித்ததாக முள்ளிவாய்க்கால் நினைவேந்தலை முன்னிட்டு வெளியிட்ட அறிக்கையில் அந்த நாட்டு பிரதமர் ஜஸ்டின் ட்ரூடோ சுட்டிக்காட்டியிருந்தார்.
இனப்படுகொலை
இந்த நிலையில், சிறிலங்காவின் முன்னாள் அரசாங்கங்களும் இனப்படுகொலை தொடர்பான குற்றச்சாட்டுக்களை தொடர்ந்து நிராகரித்து வந்ததாக வெளிவிவகார அமைச்சு வெளியிட்டுள்ள அறிக்கையில் குறிப்பிடப்பட்டுள்ளது.
கனடாவின் இந்த ஆதாரமற்ற குற்றச்சாட்டுகள், ஐ.நா கொள்கைகளுக்கு மாறாக, தனிநாடு கோரி விடுதலைப் புலிகளால் நடத்தப்பட்ட ஆயுத போருடன் தொடர்புடையது என தெரிவிக்கப்பட்டுள்ளது.
அத்துடன், தமிழீழ விடுதலைப் புலிகள் அமைப்பு, கனடா உள்ளிட்ட உலகளாவிய ரீதியில் 33 நாடுகளில் பயங்கரவாத அமைப்பாக பட்டியலிடப்பட்டுள்ளதாக சுட்டிக்காட்டப்பட்டுள்ளது.
சிறிலங்கா அரசாங்கத்தின் முயற்சி
இலங்கையில் இடம்பெற்ற போர் குறித்த ஜஸ்டின் ட்ரூடோவின் கருத்து, வெளிநாடுகளில் வாழும் இலங்கையர்கள் மத்தியில் இன நல்லிணக்கத்தை சீர்குலைக்குமென தெரிவிக்கப்பட்டுள்ளது.
அனைத்து சமூகங்களையும் சேர்ந்த சிங்களவர்கள், தமிழர்கள் உள்ளிட்ட அனைவரும் இலங்கையில் நடைபெற்ற மோதலால் பாதிக்கப்பட்டவர்கள் என சிறிலங்கா வெளிவிவகார அமைச்சு சுட்டிக்காட்டியுள்ளது.
இந்த நிலையில், கனடா பிரதமர் வெளியிட்ட கருத்து இலங்கையர்கள் மத்தியில் பாதகமான தாக்கத்தை ஏற்படுத்துவதாகவும் தேசிய ஒருமைப்பாடு, நல்லிணக்கம் மற்றும் முன்னேற்றத்திற்கான சிறிலங்கா அரசாங்கத்தின் தொடர்ச்சியான முயற்சிகளை சீர்குலைக்கும் வகையில் இருப்பதாக குற்றஞ்சாட்டப்பட்டுள்ளது.
செய்திகளை உடனுக்குடன் தெரிந்து கொள்ள IBC தமிழ் WHATSAPP இல் இணைந்து கொள்ளுங்கள்...! |
அனலைதீவு 3ம் வட்டாரம், புங்குடுதீவு 5ம் வட்டாரம், Bünde, Germany, Selm, Germany
11 Jul, 2024
