தமிழ் இனப் படுகொலையை நினைவூட்டும் ஊர்திப் பவனி - மன்னாரில் மக்கள் அஞ்சலி!
தமிழினப் படுகொலை வாரத்தை முன்னிட்டு இனப்படுகொலைக்கு நீதி கோரியும், அதே நேரம் முள்ளிவாய்கால் நினைவுகளை சுமந்தும் தமிழர் தாயகப் பகுதிகளில் தமிழ் இனப்படுகொலை ஊர்தி பவணி தமிழ் உணர்வாளர்களால் முன்னெடுக்கப்பட்டு வருகின்றது.
அந்தவகையில், நேற்றைய தினம்(12) வெள்ளிக்கிழமை தமிழனப் படுகொலை இடம் பெற்ற, கொத்து கொத்தாக தமிழ் மக்கள் கொன்று புதைக்கப்பட்ட முள்ளிவாய்கால் நினைவு முற்றத்தில் இருந்து ஆரம்பித்த பவனியானது இன்று சனிக்கிழமை(13) இரண்டாம் நாள் பயணத்தை வவுனியாவில் இருந்து ஆரம்பமானது.
நினைவு ஊர்தி பயணம்
வவுனியாவில் பொது மக்களின் அஞ்சலியின் பின்னர் புறப்பட்ட ஊர்தியானது இன்று மாலை 4 மணியளவில் மன்னார் பிரதான சுற்றுவட்ட பகுதி மற்றும் மாவட்ட செயலகத்துக்கு முன்பாக மக்களின் அஞ்சலிக்காக நிறுத்தப்பட்டது.
பலர் இணைந்து அஞ்சலி செலித்தினர், அதனைத் தொடர்ந்து நினைவு ஊர்தியானது பவனியாக பேசாலை செல்வதுடன், மாலை ஐந்து மணியளவில் பேசாலை பகுதியிலும் அஞ்சலி நிகழ்வு இடம்பெறவுள்ளமை குறிப்பிடத்தக்கது.
