கிரிஷ் நிறுவன பணத்திற்கு நன்றி தெரிவித்த நாமல்! நீதிமன்றில் அம்பலமான கடிதம்

சர்ச்சைக்குரிய கிரிஷ் நிறுவனத்தால் இலஞ்சமாக வழங்கப்பட்டதாகக் கூறப்படும் 70 மில்லியன் ரூபாயைத் தாம் பெற்றுக்கொண்டதை உறுதிசெய்து, நாடாளுடன்ற உறுப்பினர் நாமல் ராஜபக்ச அனுப்பிய கடிதம் தொடர்பில் தகவல் வெளியாகியுள்ளது.

கொழும்பு கோட்டையில் உள்ள டிரான்ஸ்வொர்க்ஸ் சதுக்கத்தில் அமைந்துள்ள 4.3 ஏக்கர் நிலத்தை குத்தகை அடிப்படையில் கையகப்படுத்தும் செயல்முறையை விரைவுபடுத்துவதற்கு ஈடாக, 'கிரிஷ்' நிறுவனத்தால் இலஞ்சமாக வழங்கப்பட்டதாகக் கூறப்படும் 70 மில்லியன் ரூபாயைத் தாம் பெற்றுக்கொண்டதை உறுதிசெய்து, நாமல் ராஜபக்ச அந்நிறுவனத்திற்கு நன்றிக் கடிதம் ஒன்றை அனுப்பியுள்ளார் என, இலஞ்சம் அல்லது ஊழல் விசாரணை ஆணைக்குழு நீதிமன்றத்தில் வெளிப்படுத்தியுள்ளது.

கொழும்பு பிரதான நீதவான் அசங்க எஸ். போதரகம முன்பு இவ்வழக்கு விசாரணைக்கு எடுத்துக்கொள்ளப்பட்டபோது, ​​இலஞ்ச ஆணைக்குழுவின் அதிகாரிகளால் குறித்த விடயம் சுட்டிக்காட்டப்பட்டுள்ளது.

'கிரிஷ்' இலஞ்ச ஊழல் வழக்கு : நாமல் ராஜபக்சவை நாளையதினம் நீதிமன்றில் முற்படுத்த உத்தரவு

கையெழுத்து பரிசோதனை

நிமல் பெரேரா தலைவராக இருந்த 'சிலோன் பிரீமியர் ஸ்போர்ட்ஸ் லிமிடெட்' என்ற விளையாட்டுக் கழகத்தின் கணக்கில், கிரிஷ் நிறுவனத்தால் சம்பந்தப்பட்ட தொகை வரவு வைக்கப்பட்டதாகவும், பின்னர் அந்தப் பணத்தைச் சந்தேக நபரான நாமல் ராஜபக்ச பெற்றுக்கொண்டதாகவும் இலஞ்ச ஊழல் விசாரணை ஆணைக்குழு நீதிமன்றத்தில் சுட்டிக்காட்டியுள்ளது.

உரிய தொகையைப் பெற்றுக்கொண்டதற்காக நன்றி தெரிவித்து, நாமல் 2012 டிசம்பர் 15 அன்று கிரிஷ் நிறுவனத்திற்கு ஒரு கடிதம் அனுப்பியிருந்ததாகவும் விசாரணை அதிகாரிகள் தெரிவித்துள்ளனர்.

மேலும், சந்தேகநபரான நாமல் ராஜபக்ச சிறையில் உளள் நிலையில் அவரது கையெழுத்து மாதிரிகளை எடுத்து, கடிதத்தில் உள்ள கையெழுத்தைப் பரிசோதிப்பதற்காக அரசாங்கப் பகுப்பாய்வாளரிடம் சமர்ப்பிக்க அனுமதி வழங்குமாறு இலஞ்ச ஆணைக்குழு நீதிமன்றத்தைக் கேட்டுக்கொண்டுள்ளது.

நகர அபிவிருத்தி அதிகார சபைக்குச் சொந்தமான, கொழும்பு கோட்டையில் உள்ள மதிப்புமிக்க நிலத்தைக் கையகப்படுத்துவதற்குத் தேவையான ஒப்புதலை விரைவாகப் பெறுவதற்காக, அந்நிறுவனத்தின் இந்திய தேசிய இயக்குனர்களான அமித் கத்யால் மற்றும் ராஜேந்திர பிரசாத் குப்தா ஆகியோர் 7 கோடி ரூபாய் இலஞ்சம் வழங்கியதாகக் குற்றம் சாட்டப்பட்டுள்ளது.

ஜானகியின் 70 மில்லியன் பரிவர்த்தனை! நாமல் விவகாரத்தில் சிக்கிய இந்திய பணிப்பாளர்கள்

நான்காவது சந்தேக நபர்

இவ்வழக்கில் மூன்றாவது மற்றும் நான்காவது சந்தேக நபர்களான ஜானகி சிறிவர்தன மற்றும் நாமல் ராஜபக்ச ஆகியோர் சிறை அதிகாரிகளால் நீதிமன்றத்தில் முன்னிலைப்படுத்தப்பட்ட பின்னர், தனது வாதங்களை முன்வைத்த இலஞ்ச ஆணைக்குழு, இந்தப் பரிவர்த்தனை நிறுவனத்தின் வழக்கமான நடைமுறைகளுக்கு அப்பாற்பட்டது என்று கிரிஷ் நிறுவனத்தின் கணக்காளர் வாக்குமூலம் அளித்திருந்ததாகத் தெரிவித்தது.

நிமல் பெரேரா அந்த நிறுவனத்தின் வாடிக்கையாளராகவோ, ஊழியராகவோ அல்லது பிற சேவை வழங்குநராகவோ இல்லாதபோதிலும், அவருக்கு இந்தத் தொகையைச் செலுத்துமாறு நிறுவனத்தின் இயக்குநர்கள் குழு பரிந்துரைத்திருந்ததும் தெரியவந்துள்ளது.

2012-ஆம் ஆண்டு முதல் சிலோன் பிரீமியர் ஸ்போர்ட்ஸ் லிமிடெட் நிறுவனத்தால் ரக்பி போட்டிகள் நடத்தப்பட்டு வந்தபோதிலும், இந்த 70 மில்லியன் ரூபாய் தொகையானது ரக்பி அல்லது வேறு எந்த விளையாட்டையும் மேம்படுத்துவதற்காகப் பயன்படுத்தப்பட்டது என்பதற்கோ அல்லது விளம்பரதாரராக வழங்கப்பட்டது என்பதற்கோ எந்த ஆதாரமும் சமர்ப்பிக்கப்படவில்லை என்று இலஞ்ச ஆணைக்குழு நீதிமன்றத்தில் மேலும் தெரிவித்துள்ளது.