G7 கையிருப்பிலிருந்து சந்தைக்கு வரப்போகும் 100 மில்லியன் பீப்பாய் எண்ணெய்!

Crude Oil Iran-US Conflict

By Dharu Oct 03, 2026 01:42 AM GMT

Dharu

in இலங்கை

Report

தங்களது மூலோபாய எண்ணெய் கையிருப்பிலிருந்து 100 மில்லியன் பீப்பாய்கள் எண்ணெயை அடுத்த நான்கு மாதங்களுக்குள் சந்தைக்கு வெளியிட G7 நாடுகள் தீர்மானித்துள்ளதாக வெளிநாட்டு ஊடகங்கள் செய்தி வெளியிட்டுள்ளன.

அமெரிக்கா மற்றும் இஸ்ரேல் இணைந்து ஈரானுக்கு எதிராக முன்னெடுத்து வரும் இராணுவ நடவடிக்கைகளால் உலக சந்தையில் எரிபொருள் விலைகள் வேகமாக அதிகரித்து வரும் நிலையில், அதனைக் கட்டுப்படுத்தும் நோக்கில் இந்த முடிவு எடுக்கப்பட்டுள்ளதாக கூறப்படுகிறது.

பிரான்ஸ் ஜனாதிபதி இமானுவல் மக்ரோன் தலைமையில் நடைபெற்ற கலந்துரையாடலின் பின்னர் இந்தத் தீர்மானம் எடுக்கப்பட்டுள்ளதாகவும், இந்த நடவடிக்கை சர்வதேச எரிசக்தி முகமை (IEA) ஊடாக ஒருங்கிணைக்கப்படவுள்ளதாகவும் தெரிவிக்கப்படுகிறது.

இதன் கீழ், குறிப்பாக டீசல் தட்டுப்பாட்டை சமாளிக்கும் வகையில், முதல் 20 நாட்களுக்குள் கணிசமான அளவு டீசல் கையிருப்பை சந்தைக்கு விடுவிக்க நடவடிக்கை எடுக்கப்படவுள்ளதாகவும் தகவல்கள் தெரிவிக்கின்றன.

அமெரிக்க ஜனாதிபதி இணக்கம்

இதனிடையே, ஐரோப்பிய நாடுகள் தங்களிடமுள்ள டீசல் கையிருப்பை சந்தைக்கு வெளியிடுவதற்கு இணக்கம் தெரிவித்துள்ளதாக அமெரிக்க ஜனாதிபதி டொனால்ட் ட்ரம்ப் தெரிவித்துள்ளார்.

G7 கையிருப்பிலிருந்து சந்தைக்கு வரப்போகும் 100 மில்லியன் பீப்பாய் எண்ணெய்! | 100 Million Barrels Of Oil Set To Hit The Market

அமெரிக்காவில் டீசல் ஒரு கலனின் விலை 6.37 அமெரிக்க டொலர் வரை அதிகரித்துள்ளதாகவும், எதிர்வரும் நவம்பர் மாதத் தேர்தலை முன்னிட்டு எரிபொருள் விலை உயர்வு ட்ரம்ப் நிர்வாகத்துக்கு அரசியல் ரீதியாக தாக்கத்தை ஏற்படுத்தியுள்ளதாகவும் தெரிவிக்கப்படுகிறது.

ஹோர்முஸ் நீரிணையில் கப்பல் போக்குவரத்துக்கு ஏற்பட்டுள்ள தடைகள் காரணமாக இந்த எரிசக்தி நெருக்கடி உருவாகியுள்ளதாகவும், நிலைமையை கட்டுப்படுத்துவதற்காக எதிர்வரும் நாட்களில் G7 நாடுகள் மேலும் நடவடிக்கைகளை முன்னெடுக்க எதிர்பார்த்துள்ளதாகவும் வெளிநாட்டு ஊடகங்கள் தெரிவிக்கின்றன.