இலங்கைக்கு அருகே சிக்கியுள்ள ஈரானியக் கப்பல்கள் : அமெரிக்காவின் தடை குறித்து விளக்கம்

Sri Lanka United States of America Iran Ministry of Foreign Affairs - sri lanka

By Sathangani Oct 03, 2026 05:21 AM GMT

Sathangani

in இலங்கை

Report

இலங்கைக்கு அருகிலுள்ள சர்வதேசக் கடற்பரப்பில் சிக்கியுள்ள ஈரானியக் கப்பல்களுக்குச் சேவைகளை வழங்கினால், இலங்கைக்கு எதிராகத் தடைகள் விதிக்கப்படலாம் என வெளியாகும் தகவல்கள் குறித்து வெளிவிவகார அமைச்சு விளக்கமளித்துள்ளது.

அதன்படி, அமெரிக்காவின் இந்த இரண்டாம் நிலைத் தடைகள் என்பது ஏதேனும் குறிப்பிட்ட ஒரு நாட்டையோ அல்லது இலங்கையையோ இலக்கு வைத்து விதிக்கப்பட்டது அல்ல என வெளிவிவகார அமைச்சின் ஊடகப் பேச்சாளரும் பணிப்பாளர் நாயகமுமான துஷார ரொட்ரிகோ தெரிவித்துள்ளார்.

மாறாக, இது உலகம் முழுவதற்கும் பொதுவாக நடைமுறைப்படுத்தப்படும் அமெரிக்காவின் சாதாரண உலகளாவிய கொள்கை மட்டுமே என்றும் அவர் மேலும் சுட்டிக்காட்டியுள்ளார்.

வெளிவிவகார அமைச்சின் அறிவிப்பு

அத்துடன் இத்தகைய தடைகளால் பாதிக்கப்படும் கப்பல்கள் இந்தியப் பெருங்கடலில் மட்டுமே காணப்படுபவை அல்ல என்றும், மோதல்கள் மற்றும் அது தொடர்பான புவிசார் அரசியல் சூழல்களுக்கு மத்தியில் உலகின் பிற கடல் பகுதிகளிலும் இது போன்ற கப்பல்கள் காணப்படுகின்றன என்றும் குறிப்பிட்டார்.

இலங்கைக்கு அருகே சிக்கியுள்ள ஈரானியக் கப்பல்கள் : அமெரிக்காவின் தடை குறித்து விளக்கம் | Srilanka Clarifies Us Sanctions On Iranian Vessels

கப்பல் போக்குவரத்து மற்றும் வணிகக் கப்பல் துறையில் ஈடுபட்டுள்ள தனிநபர்கள் மற்றும் நிறுவனங்களுக்கு, இந்த இரண்டாம் நிலைத் தடைகள் குறித்தும், அவற்றால் தங்கள் வணிகங்களுக்கு ஏற்படக்கூடிய விளைவுகள் குறித்தும் பொதுவாகத் தெரியும் என்றும் அவர் கூறினார்.

இதேவேளை இலங்கை கடற்பரப்புக்கு அருகில் சிக்கியுள்ள ஈரானிய எண்ணெய் தாங்கி கப்பல்களுக்குத் தேவையான அத்தியாவசியச் சேவைகளை வழங்கினால், இலங்கை மீது தடைகள் விதிக்கப்படலாம் என கொழும்பிலுள்ள அமெரிக்கத் தூதரகம் எச்சரித்துள்ளதாக அமெரிக்காவின் 'வோல்ஸ்ட்ரீட் ஜர்னல்' (The Wall Street Journal) செய்தியொன்றை வெளியிட்டிருந்தது.

இந்த நிலையிலேயே வெளிவிவகார அமைச்சு குறித்த விடயம் தொடர்பில் விளக்கம் அளித்துள்ளமை குறிப்பிடத்தக்கது.