மயிலத்தமடுவில் மனித உரிமை செயற்பாட்டாளர்களை தடுத்து நிறுத்திய காவல்துறை(படங்கள்)
மட்டக்களப்பு மாதவன மயிலத்தமடு பண்ணையாளர்கள் விவகாரம் தொடர்பாக கள நிலவரங்களை அறிந்து கொள்வதற்காக மயிலத்தமடுவுக்குச் சென்ற மனித உரிமை செயற்பாட்டாளர்கள் சிலர் இலங்கை காவல்துறையினரால் தடுத்து நிறுத்தப்பட்டுள்ளனர்.
இன்று காலை சுமார் 10 மணி தொடக்கம் 12 மணி வரைக்கும் மயிலத்தமடுவில் அமைக்கப்பட்டுள்ள காவல் நிலையத்தில் இருந்த காவல்துறையினர் குறித்த தரப்பினரை தடுத்து நிறுத்தியுள்ளனர்.
சிரேஸ்ட காவல்துறை மா அதிபரின் ஆலோசனைக் அமைவாக அவர்களை உள்ளே செல்வதற்கு அனுமதிக்கவில்லை எனவும் தெற்கை தளமாக கொண்டு செயல்படும் மனித உரிமை செயற்பாட்டாளர் ருக்கி பெனான்டோ தெரிவித்துள்ளார்.
பண்ணையாளர்களுக்கு ஆதரவு
தொடர்ச்சியாக இன்றுடன் 56வது நாட்களாக தங்களது நில மீட்புக்கோரிய போராட்டத்தில் மாதவனை மயிலத்தமடு பண்ணையாளர்கள் ஈடுபட்டு வருகின்றனர்.
அந்தப் பண்ணையாளர்களுக்கு ஆதரவு தெரிவிக்கும் விதமாக உண்மைகளை கண்டறியும் நோக்கத்துடன் தெற்கில் உள்ள சிவில் சமூக செயற்பாட்டாளர்கள் மனித உரிமை செயற்பாட்டாளர்கள் களத்தில் வந்து ஆதரவு தெரிவிக்கவும் அதனுடைய உண்மை நிலையை அறிவதற்காக குறித்த இடத்திற்கு சென்றுள்ளனர்.
அம்பிட்டிய சுமனரத்தின தேரரின் பொய்ப்பிரச்சாரம், பண்ணையாளரின் நில மீட்புக்கான அறவழிப் போராட்டம், அத்துமீறிய சிங்கள பேரினவாதிகளின் குடியேற்றம் ஒரு பக்கம் இருக்கும் நிலையில் உண்மைகள் வெளிப்பட வேண்டும் என்பதற்காக தற்போது பலரும் மாதவனை மயிலத்தமடு விவகாரம் தொடர்பாக கள விஜயங்களை மேற்கொண்டு வருகின்றனர்.
உண்மையை மக்களுக்கு வெளிப்படுத்துகின்ற நிலையிலேயே இலங்கை காவல்துறையினரின் இவ்வாறான கட்டுப்பாடுகள் அதிகரித்து இருப்பதாகவும் குறிப்பிடுகின்றனர்.
