கொழும்பு புறநகர் பகுதியில் கொடூரமாக தாக்கப்பட்டு கடத்தப்பட்ட வர்த்தகர் மீட்பு!

Sri Lanka Police Kalutara Kidnapping

By Dharu Sep 30, 2026 03:52 AM GMT

Dharu

in சமூகம்

Report

புதிய இணைப்பு

பாணந்துறை - வலான, மகாநாம வீதிப் பகுதியில் கடத்தப்பட்ட வர்த்தகர் மினுவன்பிட்டிய மயானத்திற்கு அருகில் கைவிடப்பட்டுள்ள நிலையில் மீட்கப்பட்டுள்ளார்.

குறித்த வர்த்தகர் தற்போது பாணந்துறை ஆதார வைத்தியசாலையில் அனுமதிக்கப்பட்டுள்ளதுடன், காயமடைந்த வர்த்தகரின் மனைவியும் அதே வைத்தியசாலையில் சிகிச்சை பெற்று வருவதாக காவல்துறையினர் தெரிவித்தனர்.

பணத்தகராறு காரணமாகவே இக்கடத்தல் இடம்பெற்றுள்ளதாக சந்தேகிக்கப்படுவதாக காவல்துறையினர் தெரிவித்தனர்.

வர்த்தகரின் காருக்குப் பலத்த சேதம் ஏற்பட்டுள்ளதுடன், சம்பவம் தொடர்பில் பாணந்துறை குற்றத்தடுப்புப் பிரிவு அதிகாரிகள் விசாரணைகளை ஆரம்பித்துள்ளனர்.

முதலாம் இணைப்பு

கொழும்பின் புறநகர் பகுதியான பாணந்துறையில் வர்த்தகர் ஒருவர் தனது வீட்டிற்கு சென்று கொண்டிருந்த போது, அடையாளம் தெரியாத குழுவினால் கடத்தப்பட்டுள்ளார்.

பாணந்துறை, மகாநாம வீதிக்கு அருகில் உள்ள உப வீதியொன்றில், இந்த சம்பவம் இடம்பெற்றுள்ளது.

நேற்று இரவு 10 மணியளவில் குறித்த வர்த்தகர் தனது இரு மகள்களுடனும் மனைவியுடனும் காரில் வீட்டிற்கு சென்று கொண்டிருந்தனர்.

அடையாளம் தெரியாத நபர்கள்

இதன் போது, வீட்டிற்கு அருகில் காரில் வந்த அடையாளம் தெரியாத நபர்கள், வர்த்தகரைத் தாக்கி அவரது காரின் கண்ணாடிகளை உடைத்துக் கடத்திச் சென்றுள்ளதாக பாணந்துறை தெற்கு காவல்துறையினர் தெரிவித்துள்ளனர்.

கொழும்பு புறநகர் பகுதியில் கொடூரமாக தாக்கப்பட்டு கடத்தப்பட்ட வர்த்தகர் மீட்பு! | Brutally Attacked And Abducted In Colombo

இந்தச் சம்பவத்தில் வர்த்தகரின் இரு மகள்களுக்கும் எந்தவித பாதிப்பும் ஏற்படவில்லை. சம்பவத்தில் காயமடைந்த மனைவி பாணந்துறை வைத்தியசாலையில் அனுமதிக்கப்பட்டுள்ளார்.

அடையாளம் தெரியாத குழுவினர் குறித்த வர்த்தகரைக் கடத்த முயன்றபோது, வர்த்தகர் தனது காரை நிறுத்தாமல் தொடர்ந்தும் செலுத்தியுள்ளார்.

இதன்போது கார் கட்டுப்பாட்டை இழந்து வீதியிலிருந்த வடிகானில் விழுந்துள்ளது. பின்னர் கடத்தல் கும்பல், வர்த்தகரின் காரின் கண்ணாடிகளை உடைத்து, வர்த்தகரை வெளியே இழுத்துத் தாக்கியதுடன், அவர்களின் காரில் ஏற்றிச் சென்றுள்ளனர்.