காவி உடை அணிந்து நாகப்பாம்புடன் கிளம்பிய மொட்டுக் கட்சியின் கிரேஷன் கெரமினியகே

கண்டி ஸ்ரீ தலதா மாளிகைக்கு முன்பாக ஆரம்பிக்கப்பட்ட ஒரு விசித்திரமான நடைபயணம், ஆரம்பத்திலேயே பலரது கவனத்தையும் ஈர்த்துள்ளது.

கறுப்புக் கண்ணாடி அணிந்து, நாக உருவம் செதுக்கப்பட்ட அழகிய மரக் கைத்தடியை ஏந்தியபடி காவி உடையில் பயணித்த அந்த நபர், சிங்கள பௌத்த மக்களை விழிப்படையச் செய்யும் ஒரு தலைவரைப் போல தன்னை முன்னிறுத்திக் கொண்டார்.

காவி உடைக்கு நீதி கோரி கொழும்பு நோக்கி ஆரம்பிக்கப்பட்ட இந்த நடைபயணம் ஆறு மணி நேரம் கூட நிறைவடைவதற்கு முன்னரே பெரும் அரசியல் கேலிக்கூத்தாக மாறியது.

யாழில் அரங்கேறிய கோடூரம் - 14 வருடங்களுக்கு பின் விதிக்கப்பட்ட மரண தண்டனை

உண்மையான அடையாளம் 

சமூக ஊடகங்களில் குறித்த நபரின் உண்மையான அடையாளம் தொடர்பான தகவல்கள் வெளியாகியதே இதற்குக் காரணமாகும்.

கிடைக்கப்பெறும் தகவல்கள் மற்றும் சமூக ஊடகங்களில் பகிரப்பட்ட தகவல்களின்படி, குறித்த நபர் பௌத்த பிக்குவே அல்ல எனக் கூறப்படுகிறது.

அவர் ஸ்ரீலங்கா பொதுஜன பெரமுனவைச் சேர்ந்த அம்பலாங்கொடை முன்னாள் நகரசபை உறுப்பினர் கிரேஷன் கெரமினியகே என அடையாளப்படுத்தப்பட்டுள்ளார்.

இதற்கு முன்னரும் ராஜபக்ச குடும்பத்தினருக்கு ஆதரவாகப் பல்வேறு போராட்டங்களை ஏற்பாடு செய்தவர் எனக் கூறப்படும் இவரது சமூக ஊடகக் கணக்குகளில் காணப்படும் புகைப்படங்களும் தற்போது விவாதத்திற்கு உள்ளாகியுள்ளன.

இந்த நடைபயணத்தின் தேசிய அமைப்பாளர் தெரிவிக்கையில், இது எந்தவொரு அரசியல் கட்சியையும் சாராத பயணம் என்றும், உடலில் சிங்கள பௌத்த இரத்தம் ஓடும் எவரும் இதில் கலந்துகொள்ளலாம் என்றும் குறிப்பிட்டிருந்தார்.

கடுகன்னாவை பகுதியில் அமைந்துள்ள பாரமிதா பௌத்த மத்திய நிலையத்திலிருந்து பயணத்தை ஆரம்பித்து, கேகாலையில் தங்கிய பின்னர் கொழும்பைச் சென்றடைவதே அவர்களது திட்டமாக இருந்துள்ளது.

எனினும், சுமார் ஆறு பேர் மட்டுமே கலந்துகொண்ட நிலையில் நடைபயணம் ஆரம்பிக்கப்பட்டபோது, ஊடகவியலாளர்கள் எழுப்பிய கேள்விகளுக்குப் பதிலளிப்பதற்குப் பதிலாக அவர் ஊடகவியலாளர்களைத் திட்டியதாகவும் தகவல்கள் வெளியாகியுள்ளன.

வெடிக்கும் சர்ச்சை : திலீபனின் நினைவாலயத்தை உடனடியாக அகற்றுமாறு காவல்துறை உத்தரவு!

ராஜபக்ச குடும்பத்தினருடன் தொடர்பு

தற்போது இந்தச் சம்பவம் சமூக ஊடகங்களில் கடுமையான விமர்சனங்களுக்கும் கேலிக்கும் உள்ளாகியுள்ளது.

அம்பலாங்கொடை பகுதியில் உள்ள தந்தினா தேவாலயத்தின் பூசாரியாகவும், பஹனட்ட தெல் என்ற தேசிய அமைப்பின் முக்கியஸ்தராகவும் செயற்படுவதாகக் கூறப்படும் இவர் தொடர்பில் பல்வேறு தகவல்கள் பகிரப்பட்டு வருகின்றன.

குறிப்பாக, ருவன்வெலிசாயவில் தெய்வமாக இருப்பதாகக் கூறப்படும் தந்தினா என்ற பெண் இரவு நேரங்களில் தனது கனவில் தோன்றி தகவல்களை வழங்குவதாக இவர் முன்னர் தெரிவித்திருந்ததாகவும் சமூக ஊடகப் பதிவுகள் சுட்டிக்காட்டுகின்றன.

ஞானசார தேரரை விடுவிக்கக் கோரி அண்மையில் முன்னெடுக்கப்பட்ட நடைபயணத்துக்குக் கிடைத்த ஊடகக் கவனத்தைப் போன்றதொரு கவனத்தைப் பெற்றுக்கொள்ளும் நோக்கிலேயே இந்த நடவடிக்கை முன்னெடுக்கப்பட்டதாக சமூக ஊடகங்களில் குற்றச்சாட்டுகள் முன்வைக்கப்படுகின்றன.

ராஜபக்ச குடும்பத்தினருடன் தொடர்புடைய குற்றவியல் வழக்குகளைத் திசைதிருப்பும் நோக்கில், பௌத்த காவி உடையைப் பயன்படுத்தி முன்னெடுக்கப்படும் அரசியல் நாடகம் எனவும் பலர் இதனை விமர்சித்து வருகின்றனர்.

உள்நாட்டுக் கலைஞர்களால் பெறுமதிமிக்க மர வகைகளைப் பயன்படுத்தி பாரம்பரிய முறையில் உருவாக்கப்படும் நாகக் கைத்தடியும், பௌத்த பிக்குகளின் காவி உடையும் அரசியல் நோக்கங்களுக்காகப் பயன்படுத்தப்படுவது குறித்தும் கடும் எதிர்ப்புகள் வெளியாகியுள்ளன.

உறங்கிக் கொண்டிருக்கும் சிங்கள மக்களை விழிப்படையச் செய்வோம் என்ற முழக்கத்துடன் ஆரம்பிக்கப்பட்ட இந்த நடைபயணம், சமூக ஊடகங்களில் எழுந்த கேள்விகளுக்கும் விமர்சனங்களுக்கும் மத்தியில் சில மணி நேரங்களிலேயே பெரும் சர்ச்சையாக மாறியுள்ளது.

இறுதியில், பௌத்த அடையாளங்களையும் மத உணர்வுகளையும் முன்னிறுத்தி அரசியல் கவனத்தைப் பெற முயன்ற மற்றுமொரு சர்ச்சைக்குரிய நடவடிக்கையாகவே இந்தச் சம்பவம் சமூக ஊடகங்களில் பேசப்பட்டு வருகிறது.