லெஸ்டர் பல்கலைக்கழகத்துடன் NORTHERN UNI வரலாற்றுச் சிறப்புமிக்க ஒப்பந்தம்!
யாழ்ப்பாண மாணவர்களுக்குப் புதிய சர்வதேச உயர்கல்வி வாய்ப்புகளை ஏற்படுத்தும் நோக்கில், பிரித்தானியாவின் புகழ்பெற்ற லெஸ்டர் பல்கலைக்கழகமும் (University of Leicester), NORTHERN UNI நிறுவனமும் இணைந்து புரிந்துணர்வு ஒப்பந்தமொன்றில் கைச்சாத்திடவுள்ளன.
இதற்கமைய, லெஸ்டர் பல்கலைக்கழகத்தின் தலைவரும் துணைவேந்தருமான பேராசிரியர் சேர் நிஷான் கனகராஜா, எதிர்வரும் நவம்பர் 23ஆம் திகதி யாழ்ப்பாணத்திலுள்ள NORTHERN UNI-க்கு நேரில் விஜயம் செய்து குறித்த ஒப்பந்தத்தில் கைச்சாத்திடவுள்ளார்.
இரு கல்வி நிறுவனங்களுக்கும் இடையிலான கல்விசார் ஒத்துழைப்பை மேலும் வலுப்படுத்துவதற்கு இந்த ஒப்பந்தம் முக்கிய அடித்தளமாக அமையும் என எதிர்பார்க்கப்படுகிறது.
இதற்கு முன்னதாக, பிரித்தானியாவிலுள்ள லெஸ்டர் பல்கலைக்கழகத்தில் பேராசிரியர் சேர் நிஷான் கனகராஜாவுக்கும், NORTHERN UNI நிறுவனரும் தலைவருமான இந்திரகுமார் பத்மநாதனுக்கும் இடையில் விசேட சந்திப்பொன்று இடம்பெற்றுள்ளது.
இந்தச் சந்திப்பில் NORTHERN UNI இயக்குநர் ரம்பா இந்திரகுமாரும் கலந்துகொண்டிருந்தார்.
இதன்போது, இரு கல்வி நிறுவனங்களினதும் கல்வித் திறன்கள் மற்றும் எதிர்கால இலக்குகளை ஒருங்கிணைத்து புதிய கற்கைநெறிகளை உருவாக்குவதற்கான சாத்தியக்கூறுகள் குறித்து விரிவாகக் கலந்துரையாடப்பட்டுள்ளது.
முன்மொழியப்பட்டுள்ள ஒப்பந்தத்தின் கீழ், செயற்கை நுண்ணறிவுடன் கூடிய கணினி அறிவியல் பொறியியல் பட்டப்படிப்பு (BEng Computer Science with Artificial Intelligence) மற்றும் வணிகம் மற்றும் முகாமைத்துவ இளங்கலைப் பட்டப்படிப்பு (BBA in Business and Management) உள்ளிட்ட சர்வதேச முக்கியத்துவம் வாய்ந்த கற்கைநெறிகளை வழங்க இரு நிறுவனங்களும் இணைந்து செயற்படவுள்ளன.
இதன் மூலம் யாழ்ப்பாண மாணவர்கள் தமது சொந்த மண்ணிலிருந்தே சர்வதேச தரத்திலான உயர்கல்வியைப் பெற்றுக்கொள்வதற்கான புதிய வாய்ப்பு உருவாகவுள்ளது.
மேலும், எதிர்காலத்தில் யாழ்ப்பாணத்தில் மருத்துவக் கல்லூரி ஒன்றை நிறுவுவதற்கான சாத்தியக்கூறுகள் மற்றும் விண்வெளி அறிவியல் துறையில் இணைந்து செயற்படுவது தொடர்பிலும் இரு கல்வி நிறுவனங்களும் ஆராய்ந்து வருகின்றமை குறிப்பிடத்தக்கது.

| செய்திகளை உடனுக்குடன் தெரிந்து கொள்ள IBC தமிழ் WHATSAPP CHANNEL இல் இணைந்து கொள்ளுங்கள்...! |