யாழ். மாநகர சபை பகுதியில் தொடரும் மின்வெட்டு: மக்கள் அவதி
யாழ். மாநகர சபைக்குட்பட்ட பகுதிகளில் எவ்வித முன்னறிவிப்புமின்றி அடிக்கடி மின்சாரம் துண்டிக்கப்படுவதாகவும், சில சந்தர்ப்பங்களில் ஒரு நாளில் பத்து தடவைகள் வரையிலும் மின்தடை ஏற்படுவதாகவும் மக்கள் கடும் விசனம் தெரிவித்துள்ளனர்.
மின்சாரம் துண்டிக்கப்படுவது மட்டுமன்றி, குறுகிய இடைவெளிகளில் மீண்டும் மீண்டும் மின்சாரம் துண்டிக்கப்பட்டு வருவதால் தமது அன்றாட செயற்பாடுகள் பெரிதும் பாதிக்கப்படுவதாக மக்கள் கூறுகின்றனர்.
குறிப்பாக, வீடுகளில் மின்சாதனங்களைப் பயன்படுத்துவதிலும், மாணவர்கள் கல்வி நடவடிக்கைகளை முன்னெடுப்பதிலும், இணையவழி பணிகளில் ஈடுபடுவோருக்கும் இதனால் பெரும் சிரமங்கள் ஏற்படுவதாக தெரிவிக்கப்படுகிறது.
அதேவேளை, வர்த்தக நிலையங்கள் மற்றும் சிறு தொழில் முயற்சிகளும் தொடர்ச்சியான மின்தடையால் பாதிக்கப்படுவதாக மக்கள் சுட்டிக்காட்டுகின்றனர்.
திடீர் மின்தடை மற்றும் மீண்டும் மின்சாரம் வழங்கப்படும் போது ஏற்படும் மின்னழுத்த மாற்றங்களால் மின்சாதனங்கள் சேதமடையும் அபாயமும் காணப்படுவதாக அவர்கள் தெரிவிக்கின்றனர்.
ஒரு நாளில் பல தடவைகள் மின்சாரம் துண்டிக்கப்படும் நிலையில், மின்சாரம் எப்போது வரும், மீண்டும் எப்போது துண்டிக்கப்படும் என்பது தொடர்பில் பொதுமக்களுக்கு எந்தவிதமான தெளிவான தகவலும் வழங்கப்படுவதில்லை எனவும் மக்கள் குற்றஞ்சாட்டுகின்றனர்.
“ஒரு நாளில் பத்து தடவைகள் வரையிலும் மின்சாரம் துண்டிக்கப்படும் நிலை ஏற்பட்டுள்ளது. ஒவ்வொரு முறையும் மின்சாரம் எப்போது வரும் என்று காத்திருக்க வேண்டியுள்ளது.
முன்னறிவிப்பு இல்லாததால் எங்களுடைய அன்றாட நடவடிக்கைகளை திட்டமிட முடியாத நிலை ஏற்பட்டுள்ளது” என மக்கள் தெரிவிக்கின்றனர்.
இந்நிலையில், தொடர்ச்சியான மின்தடைக்கான காரணம் என்ன என்பது தொடர்பில் சம்பந்தப்பட்ட அதிகாரிகள் தெளிவான விளக்கத்தை வழங்க வேண்டும் எனவும் மக்கள் கோரிக்கை விடுத்துள்ளனர்.
மின்வெட்டு தவிர்க்க முடியாத பராமரிப்பு நடவடிக்கைகளுக்காக மேற்கொள்ளப்படுகின்றது என்றால், அது தொடர்பில் பொதுமக்களுக்கு முன்கூட்டியே அறிவிக்கப்பட வேண்டும்.
ஆனால், எந்தவித முன்னறிவிப்புமின்றி மீண்டும் மீண்டும் மின்சாரம் துண்டிக்கப்படுவது பொதுமக்களின் அன்றாட வாழ்க்கைக்கு பெரும் இடையூறாக மாறியுள்ளதாக மக்கள் தெரிவிக்கின்றனர்.
எனவே, யாழ். மாநகர சபைக்குட்பட்ட பகுதிகளில் தொடர்ச்சியாக இடம்பெறும் மின்தடைகள் தொடர்பில் உரிய விசாரணை மேற்கொண்டு, பிரச்சினைக்கான காரணத்தை கண்டறிவதுடன், தடையற்ற மின்சார விநியோகத்தை உறுதி செய்வதற்கும் நடவடிக்கை எடுக்க வேண்டும் என மக்கள் வலியுறுத்தியுள்ளனர்.
| செய்திகளை உடனுக்குடன் தெரிந்து கொள்ள IBC தமிழ் WHATSAPP CHANNEL இல் இணைந்து கொள்ளுங்கள்...! |
