நுவரெலியாவில் வான் ஒன்றைத் திருடிச் செல்ல முயன்ற நபரொருவர் கைது!
நுவரெலியாவில் வான் ஒன்றைத் திருடிச் செல்ல முயன்ற சம்பவம் தொடர்பில் ஒருவர் கைது செய்யப்பட்டுள்ளார்.
நுவரெலியா பிளக்பூல் (Blackpool) பகுதியில் நிறுத்தி வைக்கப்பட்டிருந்த வான் ஒன்றை இவ்வாறு திருட முற்பட்டுள்ளார்.
குறித்த சம்பவம் நேற்று (30-10-2026) இடம்பெற்றுள்ளது.
வானின் உரிமையாளர்
சம்பவம் தொடர்பில் மேலும் தெரியவருகையில்,
வானின் உரிமையாளர் அளித்த தகவலின் பேரில் உடனடியாகச் செயற்பட்ட காவல்துறையினர், மேற்படி கைது நடவடிக்கையை மேற்கொண்டுள்ளனர்.
வானின் உரிமையாளரது வீட்டிற்கு அருகிலுள்ள வீதியோரத்திலிருந்து சந்தேகநபர் தனது கூட்டாளிகளுடன் சேர்ந்து வானை கடத்திச் செல்ல முயன்றுள்ளார்.
உரிமையாளர் உடனடியாக காவல்துறையினருக்கு அறிவித்ததைத் தொடர்ந்து வான் கைப்பற்றப்பட்டதுடன் அதனைச் செலுத்திச் சென்ற ஓட்டுநர் கைது செய்யப்பட்டுள்ளார்.
அத்தோடு சம்பவத்துடன் தொடர்புடைய ஏனைய சந்தேகநபர்கள் தப்பிச் சென்றுள்ளனர்.
மேலதிக விசாரணை
குறித்த வானின் உரிமையாளர் தனியார் நிதி நிறுவனம் ஒன்றிற்குச் செலுத்த வேண்டிய மாதாந்தத் தவணைப் பணத்தை உரிய காலத்தில் செலுத்தத் தவறியுள்ளார்.
இதன் காரணமாக நிதி நிறுவனத்தின் வீதிப் பறிமுதல் பிரிவினர் வாகனத்தைக் கைப்பற்றுமாறு பிறப்பித்த உத்தரவின் பேரிலேயே சந்தேகநபர்கள் இச் செயலில் ஈடுபட்டுள்ளமை ஆரம்பக் கட்ட விசாரணைகளில் தெரியவந்துள்ளது.
இந்தநிலையில் நிதி நிறுவனங்கள் அல்லது குத்தகை நிறுவனங்கள் தவணை செலுத்தாத வாகனங்களைக் கைப்பற்றுவதற்கு முன்பாக சம்பந்தப்பட்ட பிரதேச காவல் நிலையத்திற்கு அது குறித்துப் முன்அறிவித்தல் வழங்கப்பட வேண்டும் எனப் காவல்துறை தலைமையகம் சுட்டிக்காட்டியுள்ளது.
காவல்துறையினருக்கு அறிவிக்காமலும், முறையான சட்ட நடைமுறைகளைப் பின்பற்றாமலும் தன்னிச்சையாக வாகனங்களை வீதிகளிலோ அல்லது வீடுகளிலோ வைத்துப் பறிமுதல் செய்வது திருட்டு அல்லது குற்றவியல் அத்துமீறலாகவே கருதப்படும் என எச்சரிக்கப்பட்டுள்ளது.
அத்தோடு கைது செய்யப்பட்ட சந்தேகநபர் நுவரெலியா நீதவான் நீதிமன்றத்தில் முன்னிலைப்படுத்தப்படவுள்ளதுடன் தப்பிச் சென்ற ஏனைய சந்தேகநபர்களைக் கைது செய்வதற்கான மேலதிக விசாரணைகளை நுவரெலியா காவல்துறையினர் முன்னெடுத்து வருகின்றமை குறிப்பிடத்தக்கது.
செய்திகளை உடனுக்குடன் தெரிந்து கொள்ள IBC தமிழ் WHATSAPP இல் இணைந்து கொள்ளுங்கள்...! |
அல்லைப்பிட்டி, பிரான்ஸ், France
12 Nov, 2011
யாழ்ப்பாணம், நெடுந்தீவு, பண்டத்தரிப்பு, Goslar, Germany, Breda, Netherlands, Montreal, Canada
29 Sep, 2026
இமையானன் கிழக்கு உடுப்பிட்டி, சுவிஸ், Switzerland, London East Ham, United Kingdom
14 Oct, 2026
Seremban, Malaysia, நெல்லியடி, மண்டபம், India, Harrow, United Kingdom
30 Oct, 2021
