பிரிட்டனை உலுக்கும் பாலியல் அத்துமீறல் : நாடாளுமன்றில் கண்ணீருடன் விபரித்த எம்.பி

United Kingdom Child Abuse

By Jaso Jun 03, 2026 12:22 PM GMT

Jaso

in ஐக்கிய இராச்சியம்

Report

பிரிட்டன் நாடாளுமன்றத்தில் அந்நாட்டு எம்பி ரூபர்ட் லோவ் நிகழ்த்திய உருக்கமான உரை, அங்கு பல தசாப்தங்களாக நீடித்து வரும் 'Grooming Gangs' எனப்படும் சிறார் பாலியல் சுரண்டல் மற்றும் கூட்டுப் பாலியல் அத்துமீறல் சர்ச்சையை மீண்டும் விஸ்வரூபம் எடுக்க வைத்துள்ளது.

லண்டன் நாடாளுமன்றக் கூட்டத்தில், பாதிக்கப்பட்ட பெண்களின் வாக்குமூலங்களை அவர் வாசித்த போது ஒட்டுமொத்த அவையும் அதிர்ச்சியில் உறைந்தது.

அடுக்கடுக்கான கொடூரங்கள்

பாதிக்கப்பட்ட பெண்களின் வாக்குமூலங்களை வாசித்த ரூபர்ட் லோவ், "இதைக் கேட்கவே நமக்குக் கடினமாக இருக்கிறது, ஆனால் இந்த உலகம் இதைக் கேட்க வேண்டும்" என்று குறிப்பிட்டார்.

பிரிட்டனை உலுக்கும் பாலியல் அத்துமீறல் : நாடாளுமன்றில் கண்ணீருடன் விபரித்த எம்.பி | Uk Grooming Gangs Scandal

ஒரு பெண் தனது 12 வயதில் சந்தித்த கொடூரத்தையும், மற்றொரு பெண் 13 வயதிலிருந்து மூன்று ஆண்டுகளில் சுமார் 600 முதல் 700 ஆண்களால் கூட்டுப் பாலியல் வன்கொடுமைக்கு ஆளாக்கப்பட்டதையும் விவரித்தார்.

மேலும், தங்களின் மத அடையாளம் மற்றும் இனத்தைக் குறிப்பிட்டு குற்றவாளிகள் தங்களை மனரீதியாகவும், உடல்ரீதியாகவும் சித்திரவதை செய்ததாகப் பாதிக்கப்பட்ட சிறுமிகள் தெரிவித்துள்ள அடுக்கடுக்கான கொடூரங்களை அவர் நாடாளுமன்றத்தில் பதிவு செய்தார்.

இந்த விவகாரத்தில் குற்றவாளிகளுக்குச் சாதகமாகச் செயல்பட்டதாகப் பிரிட்டன் காவல்துறை மற்றும் பொது சுகாதாரத்துறை மீது பாதிக்கப்பட்ட பெண்கள் அடுக்கடுக்கான குற்றச்சாட்டுகளைச் சுமத்தியுள்ளனர்.

பிரிட்டன் அரசியலில் பெரும் புயலைக் கிளப்பியுள்ள பாலியல் அத்துமீறல்

பாதிக்கப்பட்ட 15 வயது சிறுமி ஒருவர் படுகாயங்களுடன் மருத்துவமனைக்கு சென்றபோது, அங்கிருந்த மருத்துவப் பணியாளர்கள் உரிய விசாரணை நடத்தாமல் அவரை வீட்டிற்கு அனுப்பியதாகக் குற்றம் சாட்டப்பட்டுள்ளது.

I want the world to hear what we heard. pic.twitter.com/2DtCS0QztE
— Rupert Lowe MP (@RupertLowe10) June 1, 2026

மேலும், சில காவல்துறை அதிகாரிகளே தங்களைப் பாலியல் அத்துமீறல் செய்ததாகப் பாதிக்கப்பட்ட பெண்கள் தங்களின் வாக்குமூலத்தில் குறிப்பிட்டுள்ளது பிரிட்டன் அரசியலில் பெரும் புயலைக் கிளப்பியுள்ளது.

"பாதிக்கப்பட்ட இந்த அப்பாவிப் பிள்ளைகளுக்காக உடனடியாகக் கடுமையான சட்டபூர்வ நடவடிக்கைகளை எடுக்க வேண்டும்" என்று எம்பி ரூபர்ட் லோவ் பிரிட்டன் அரசை வலியுறுத்தியுள்ளார்.