இஸ்ரேலின் தொடர் தாக்குதல்: காசாவில் பாதுகாப்பான இடமில்லை என ஐ.நா எச்சரிக்கை
காசாவில் மக்களுக்கு பாதுகாப்பான இடம் எதுவுமில்லை என்று ஐக்கிய நாடுகள் சபை எச்சரித்துள்ளது.
கடந்த 29 நாட்களாக தொடர்ந்து வரும், இஸ்ரேல் ஹமாஸ் தாக்குதலில் ஆயிரக்கணக்கானோர் பலியாகியுள்ளதோடு, பல்லாயிரக்கணக்கானோர் பாதிக்கப்பட்டுள்ளனர்.
தற்போது, இஸ்ரேல் காசாவிற்குள் வான்வழி தாக்குதலை முன்னெடுத்து வருகின்றது.
ஹமாஸ் அமைப்பினர்
ஹமாஸ் அமைப்பினரின் இராணுவ தளங்களை குறி வைப்பதாக தெரிவித்து அகதிகள் முகாம் அமைந்துள்ள பகுதிகள் மீது வான் தாக்குதல் இடம்பெறுகின்றது.
அந்த வகையில் வடக்கு காசாவின் ஜபாலியாவில் ஐக்கிய நாடுகள் சபையால் பள்ளிகளில் இருந்து மக்கள் தங்குமிடமாக மாற்றப்பட்ட கட்டிடங்கள் மீது இஸ்ரேல் வான் தாக்குதல் நடத்தியது.
ஐக்கிய நாடுகளின் நிவாரண மற்றும் பணி நிறுவனத்தின் தங்கும் இடங்கள் கடந்த 24 மணி நேரத்திற்குள் தாக்கப்பட்டு இருப்பதாக ஐ.நா தெரிவித்துள்ளது.
பலஸ்தீன அகதி
இதனால், காசாவில் தற்போது மக்கள் பாதுகாப்பாக தங்குவதற்கு இடம் எதுவுமில்லை எனவும் பலஸ்தீன அகதிகளுக்கான ஐக்கிய நாடுகள் அமைப்பு தெரிவித்துள்ளது.
எனினும், இந்த தாக்குதலில் இருப்பிடத்தை இழந்த மக்கள், ஐ.நா கட்டிடங்களில் தஞ்சம் அடைந்துள்ளனர் என்பது குறிப்பிடத்தக்கது.
