அடுத்த 3 மாதங்களுக்கு அதிகரிக்கப்படவுள்ள மின் கட்டணம் : வெளியான தகவல்
இலங்கை பொதுப் பயன்பாட்டு ஆணைக்குழுவிற்கு (PUCSL) சமர்ப்பிக்கப்பட்ட ஒரு முன்மொழிவின் படி, இலங்கை மின்சார சபை (CEB) அடுத்த மூன்று மாதங்களுக்கு மின்சாரக் கட்டணத்தை 11.5 சதவீதம் அதிகரிக்க முடிவு செய்துள்ளதாக தகவல் வெளியாகியுள்ளது.
பொதுப் பயன்பாட்டு ஆணைக்குழுவின் முன்னாள் தலைவர் ஜனக ரத்நாயக்க (Janaka Rathnayake) ஊடகங்களுக்கு உரையாற்றிய போது குறித்த விடயத்தினை தெரிவித்துள்ளார்.
இது குறித்து அவர் மேலும் தெரிவிக்கையில், டித்வா சூறாவளியின் தாக்கத்தைத் தொடர்ந்து நாட்டின் மக்கள் தொகையில் கிட்டத்தட்ட 35 சதவீதம் பேர் ஒரு நாளைக்கு மூன்று வேளை உணவு பெற போராடி வரும் நேரத்தில், முன்மொழியப்பட்ட அதிகரிப்பு வந்துள்ளது.
சூறாவளியால் ஏற்பட்ட சேதம்
பல நிறுவனங்கள் சூறாவளியால் ஏற்பட்ட மொத்த சேதத்தை 5 பில்லியன் அமெரிக்க டொலர் முதல் 6 பில்லியன் அமெரிக்க டொலர் வரை மதிப்பிட்டுள்ள நிலையில் மின்சார சபைக்கு மட்டும் சுமார் 20 பில்லியன் ரூபாய் இழப்பு ஏற்பட்டுள்ளது.
சர்வதேச நாணய நிதியம் (IMF) செய்த 2026 ஆம் ஆண்டிற்கான மொத்த உள்நாட்டு உற்பத்தி (GDP) வளர்ச்சி கணிப்புகளின் அடிப்படையில் கட்டண திருத்தங்கள் நியாயப்படுத்தப்பட்டுள்ளன. கடந்த ஆண்டு மின்சார சபையின் வருமானம் தோராயமாக 470 பில்லியன் ரூபாய் ஆகும்.
சமீபத்திய கட்டண திருத்தத்தைத் தொடர்ந்து, மின்சார சபை அதன் பதிவான இழப்புகளில் சுமார் 60 சதவீதத்தை நுகர்வோரிடமிருந்து வசூலிக்க முயற்சிக்கின்றது.
அதன்படி, அடுத்த மூன்று மாதங்களில் மின்சார பயனர்களிடமிருந்து சுமார் 7 பில்லியன் ரூபாய் வசூலிக்கப்படும் என்று எதிர்பார்க்கப்படுகிறது.
மின்சார சபையின் செயற்பாடு
இயற்கை பேரழிவால் ஏற்படும் இழப்புகளை நேரடியாக நுகர்வோருக்கு மாற்ற முயற்சிக்கும் நாட்டில் உள்ள ஒரே நிறுவனம் மின்சார சபையாக இருக்கலாம். இந்த நடவடிக்கை நியாயமற்றது. மின்சார சபையால் ஏற்படும் இழப்புகளை அரசாங்கமே ஏற்க வேண்டும், பொதுமக்கள் மீது சுமத்தக்கூடாது.
சில பகுதிகள் இன்னும் மின்சாரம் இல்லாமல் உள்ளன. சமீபத்திய கனமழை இருந்தபோதிலும், மின்சார சபை நீர் மின்சாரத்தை விட வெப்ப மின்சாரத்தைப் பயன்படுத்தி சுமார் 60 சதவீத மின்சாரத்தை உற்பத்தி செய்வதாக அறிவித்துள்ள நிலையில் மின்சாரக் கட்டணத்தை ஏன் அதிகரிக்க வேண்டும்.
2026 மற்றும் 2029க்கு இடையில் அனைத்து சலுகை கட்டண விகிதங்களையும் நீக்குதல், அனைத்து நுகர்வோரையும் ஒரே நிலையான விகித முறையின் கீழ் கொண்டு வருதல் மற்றும் நுகர்வோர் வகைகளிடையே குறுக்கு மானியத்தை நீக்குதல் ஆகிய கோரிக்கைகளும் இந்த முன்மொழிவில் அடங்குகின்றது” என தெரிவித்தார்.
| செய்திகளை உடனுக்குடன் தெரிந்து கொள்ள IBC தமிழ் WHATSAPP CHANNEL இல் இணைந்து கொள்ளுங்கள்...! |
ஊர்காவற்றுறை, Biel/Bienne, Switzerland, கொழும்பு, யாழ்ப்பாணம், வேலணை
17 Mar, 2025
