முன்கூட்டியே அறியப்பட்ட நீர்கொழும்பு சிறைச்சாலை குறித்த புலனாய்வுத் தகவல்!

நீர்கொழும்பு சிறைச்சாலையில் வன்முறை ஏற்படக்கூடும் என்ற உளவுத் தகவல் சில நாட்களுக்கு முன்னர் கிடைத்திருந்தபோதிலும், அதனைத் தடுக்க அதிகாரிகள் உரிய நடவடிக்கை எடுக்கத் தவறிவிட்டதாக நாடாளுமன்ற உறுப்பினர் ஹர்ஷனா ராஜகருண, குற்றஞ்சாட்டியுள்ளார்.

தற்போதைய நிர்வாகத்திடம் முறையான தலைமைத்துவம், மேலாண்மை திறன் அல்லது இத்தகைய நெருக்கடிகளை கையாளும் அனுபவம் இல்லை என்றும், நீர்கொழும்பு சிறைச்சாலை சம்பவம் நாட்டின் ஆளுகை அமைப்பில் நிலவும் பலவீனத்தை வெளிப்படுத்துவதாகவும் அவர் குற்றம்சாட்டியுள்ளார்.

மேலும், இந்த நிர்வாகத் திறமையின்மையை விவசாயிகளும், வணிக சமூகத்தினரும் ஏற்கனவே அனுபவித்துள்ளதாகக் குறிப்பிட்ட அவர், நீர்கொழும்பு சிறைச்சாலையில் நடந்த வன்முறை ஒரே இரவில் ஏற்பட்டதல்ல என்றும் வலியுறுத்தியுள்ளார்.

கோட்டாபயவின் வீட்டில் பிள்ளையான் குழுவுடன் அசாத் மௌலானா! அம்பலப்படுத்திய சட்டமா அதிபர் திணைக்களம்

வன்முறைச் சம்பவம்

சம்பவம் நடைபெறுவதற்கு மூன்று அல்லது நான்கு நாட்களுக்கு முன்பே புலனாய்வு அமைப்புகள் அரசாங்கத்துக்கு எச்சரிக்கை வழங்கியிருந்தபோதிலும், அதற்கேற்ற நடவடிக்கைகளை எடுக்க பொறுப்புக்கூற வேண்டியவர்கள் தவறியதன் விளைவாகவே இந்தக் கடுமையான நிலைமை ஏற்பட்டதாக ஹர்ஷனா ராஜகருண தெரிவித்துள்ளார்.

இதற்கிடையில், நீர்கொழும்பு சிறைச்சாலையில் இடம்பெற்ற வன்முறைச் சம்பவம் தொடர்பில் முழுமையான விசாரணை நடத்த சிறப்புக் குழுவொன்றை நியமிக்க அமைச்சரவை ஒப்புதல் வழங்கியுள்ளது.

இந்தத் தீர்மானம் கடந்த 6ஆம் திகதி நடைபெற்ற அமைச்சரவைக் கூட்டத்தில் எடுக்கப்பட்டது.

சம்பவத்துக்கான காரணங்களை கண்டறிதல், எதிர்காலத்தில் மேற்கொள்ள வேண்டிய நடவடிக்கைகளை பரிந்துரைத்தல் மற்றும் இதுபோன்ற சம்பவங்கள் மீண்டும் இடம்பெறாமல் தடுக்கும் வழிமுறைகளை முன்வைத்தல் ஆகியவை குழுவின் பிரதான பொறுப்புகளாக அறிவிக்கப்பட்டுள்ளன.

நீதித்துறை அமைச்சர் ஹர்ஷனா நனயக்கார, இன்று (07) நாடாளுமன்றத்தில் வெளியிட்ட விசேட அறிக்கையில், ஜனாதிபதியின் செயலாளர் இந்த விசாரணைக் குழுவை நியமிப்பார் என தெரிவித்துள்ளார்.

வாடகை வீட்டிலிருந்து சடலமாக மீட்கப்பட்ட சட்டக் கல்லூரி மாணவி!

இறுதி அறிக்கை  

ஓய்வுபெற்ற உயர் நீதிமன்ற நீதியரசர் பிரியந்த பெர்னாண்டோ குழுவின் தலைவராக நியமிக்கப்படுவதுடன், ஓய்வுபெற்ற மேலதிக சொலிசிட்டர் ஜெனரலும் ஜனாதிபதி சட்ட ஆலோசகருமான மிலிந்த குணதிலக்க மற்றும் ஜனாதிபதி சட்ட ஆலோசகர் மோகன் வீரகோன் ஆகியோர் உறுப்பினர்களாகச் செயல்படவுள்ளனர்.

சம்பவம் தொடர்பான அனைத்து உண்மைகளையும் ஆராய்ந்து, தனது பரிந்துரைகளுடன் கூடிய இறுதி அறிக்கையை அரசாங்கத்திடம் சமர்ப்பிக்க இந்தக் குழுவுக்கு பொறுப்பு வழங்கப்பட்டுள்ளது.

இதனிடையே, நீர்கொழும்பு சிறைச்சாலை சம்பவம் தொடர்பான உடனடி குற்றவியல் விசாரணைகளை காவல்துறை மா அதிபரின் பணிப்புரையின் பேரில் குற்றப் புலனாய்வுத் திணைக்களம் (CID) மற்றும் கொழும்பு குற்றப் பிரிவு (CCD) ஆகியவை மேற்கொண்டு வருகின்றன.

நீர்கொழும்பு சிறைச்சாலை வன்முறை சம்பவம் : உயிரிழந்தவர்கள் தொடர்பில் நீதிமன்றம் விடுத்த உத்தரவு