நவநீதம் பிள்ளைக்கு அமைதிக்கான நோபல் பரிசு அறிவிப்பு!

இலங்கையின் உள்நாட்டுப் போருக்குப் பின்னர், பொறுப்புக்கூறலை உறுதி செய்வதிலும் மனித உரிமை மீறல்களை விசாரிப்பதிலும் முக்கியப் பங்காற்றிய, ஐக்கிய நாடுகள் சபையின் முன்னாள் மனித உரிமைகள் உயர் ஆணையர் நவநீதம் நவி பிள்ளைக்கு  2026ஆம் ஆண்டுக்கான அமைதிக்கான நோபல் பரிசு அறிவிக்கப்பட்டுள்ளது.

"அமைதி மற்றும் சர்வதேச சட்டத்தை மேம்படுத்துவதில் அவர் ஆற்றிய தொடர்ச்சியான பணிக்காக" இந்திய வம்சாவளியைச் சேர்ந்த நவி பிள்ளைக்கு நோபல் அமைதிப் பரிசு வழங்கப்படும் என்று நார்வே நோபல் குழுவின் தலைவர் ஜோர்கன் ஃபிரைடன்ஸ் நேற்று (9) மாலை நடைபெற்ற செய்தியாளர் சந்திப்பில் அறிவித்தார்.

ஐக்கிய நாடுகள் சபையின் மனித உரிமைகள் ஆணைக்குழுவின் முன்னாள் உயர்ஸ்தானிகராகவும், சர்வதேச குற்றவியல் நீதிமன்றத்தின் (ICC) நீதிபதியாகவும் பணியாற்றிய நவநீதம் பிள்ளை, உலகளவில் மனித உரிமைப் பாதுகாப்பிலும் சர்வதேச நீதித்துறையிலும் முன்னணிப் பங்காற்றியவர்.

உக்ரைனில் ரஷ்யா கோரத்தாண்டவம் :பேருந்தில் சென்றவர்கள் துடிதுடித்து பலி

முதன் முதலில் குரல் கொடுத்தவர்

2009ஆம் ஆண்டு இலங்கையில் இறுதிக்கட்டப் போர் முடிவுக்கு வந்த காலகட்டத்தில், போரின் போது இடம்பெற்றதாகக் கூறப்படும் மனித உரிமை மீறல்கள் மற்றும் போர்க்குற்றங்கள் குறித்து சர்வதேச மட்டத்தில் முதன்முதலில் குரல் கொடுத்த பிரதான நபர்களில் ஒருவராக அறியப்படுகிறார்.

அவரது காலகட்டத்தில் சமர்ப்பிக்கப்பட்ட அறிக்கைகள் மற்றும் பரிந்துரைகளின் அடிப்படையிலேயே, 2014 ஆம் ஆண்டு ஐ.நா மனித உரிமைகள் பேரவையில் இலங்கைக்கு எதிரான தீர்மானம் நிறைவேற்றப்பட்டு, இலங்கை தொடர்பான ஐ.நா மனித உரிமைகள் உயர்ஸ்தானிகர் அலுவலகத்தின் விசேட விசாரணைக்குழு (OISL) அமைக்கப்பட்டது.

காணாமல் ஆக்கப்பட்டோர் விவகாரம், வடக்கு-கிழக்கில் இராணுவமயமாக்கலைக் குறைத்தல், காணிகளை மீளளித்தல், ஊடக சுதந்திரம் மற்றும் மனித உரிமைச் செயற்பாட்டாளர்களின் பாதுகாப்பு ஆகிய விடயங்களில் இலங்கை அரசு சர்வதேச தரநிலைகளைப் பின்பற்ற வேண்டும் எனத் தொடர்ந்து அழுத்தங்களை வழங்கி வந்தது

தென்னாப்பிரிக்காவில் ஆழமாக வேரூன்றிய பாகுபாட்டிற்கு எதிராகப் போராடிய வழக்கறிஞராகத் தனது நீண்ட தொழில் வாழ்க்கையைத் தொடங்கிய நவி பிள்ளையை, அவரது 'வலுவான தார்மீக அடித்தளத்திற்காகவும்' மற்றும் இந்த ஆண்டுக்கான நோபல் பரிசு வெற்றியாளராக அவர் ஆற்றிய பணிக்காகவும் நோபல் குழுத் தலைவர் பெரிதும் பாராட்ட மறக்கவில்லை.

நவனீதன் (நவி) பிள்ளை 2008 முதல் 2014 வரை ஐக்கிய நாடுகள் சபையின் மனித உரிமைகள் உயர் ஆணையராகப் பணியாற்றியிருந்ததார்.

வெனிசுலாவின் முன்னாள் ஜனாதிபதி மற்றும் மனைவி மீது புதிய குற்றச்சாட்டை முன்வைத்த அமெரிக்க அரசு

முள்ளிவாய்க்கால் தமிழர்கள் படுகொலை குறித்து சர்வதேச விசாரணைக்கு ஐ.நா. மனித உரிமைகள் உயர் ஆணையராக வலியுறுத்தியவராக, நவனீதம் பிள்ளை காணப்படுகிறார்.

நெல்சன் மண்டேலா மற்றும் நிறவெறிக்கு எதிராகப் போராடிய மற்றவர்களைப் பாதுகாத்த அவரது ஆரம்பகாலப் பணியிலிருந்து, நமது காலத்தின் சில முக்கிய சர்வதேச நீதிமன்ற வழக்குகளில் நீதிபதியாக அவர் ஆற்றிய சேவை வரை ஒரு பொதுவான தொடர்பு உள்ளதாக நோபல் குழு அறிவித்துள்ளது.

உக்ரைனில் ரஷ்யாவின் கொடூர ஏவுகணைத் தாக்குதல்: அதிகரிக்கும் பலி எண்ணிக்கை

இலங்கையில் இடம்பெற்ற இறுதி யுத்த காலப்பகுதியான , 2008 செப்டம்பரில் ஐ.நா. மனித உரிமைகள் உயர் ஆணையராகப் பொறுப்பேற்பதற்கு முன்னர், அவர் 2003 முதல் 2008 வரை சர்வதேச குற்றவியல் நீதிமன்றத்தின் நீதிபதியாகப் பணியாற்றினார்.

2009 மே 26 அன்று, இலங்கை அரசாங்கம் வெற்றியை அறிவித்த ஒரு வாரத்திற்குப் பிறகு, ஐ.நா மனித உரிமைகள் பேரவை இலங்கை தொடர்பாக ஒரு சிறப்பு அமர்வை நடத்தியது. அதில் காணொளி வாயிலாக உரையாற்றிய பிள்ளை, இரு தரப்பினரும் "பொதுமக்களின் மீறமுடியாத தன்மை எனும் அடிப்படைக் கொள்கையை மிக மோசமாகப் புறக்கணித்துள்ளனர்" என்று நம்புவதற்கு வலுவான காரணங்கள் இருப்பதாகக் கூறினார். மேலும், "ஒரு சுதந்திரமான மற்றும் நம்பகமான சர்வதேச விசாரணைக்கு" அவர் அழைப்பு விடுத்ததாக ஐ.நா-வின் சொந்தப் பதிவேடு குறிப்பிடுகிறது .

போரின் இறுதி மாதங்களில் சுமார் 40,000 பொதுமக்கள் கொல்லப்பட்டதாகவும், அவர்களில் பெரும்பாலோர் அரசாங்கத்தின் குண்டுவீச்சாலேயே இறந்ததாகவும் ஐ.நா. நிபுணர் குழு ஒன்று பின்னர் மதிப்பிட்டது.

எனினும்  நவநீதம் பிள்ளை அந்தப் பிரச்சினையைக் கைவிடவில்லை. 2009 அக்டோபரில் பிரஸ்ஸல்ஸில் செய்தியாளர்களிடம் பேசிய அவர், விசாரணைக்கான கோரிக்கைகளை அரசாங்கம் "எதிர்த்து வருகிறது" என்று கூறினார் . "தீவிரமான விசாரணைகளை நடத்துவதில் அவர்களுக்குச் சிறந்த சாதனைப் பதிவு இல்லை," என்று அவர் கூறினார்.

2013 ஆம் ஆண்டு ஆகஸ்ட் மாதம், போர் முடிவடைந்த பின்னர் இலங்கைக்கு வருகை தந்த முதல் ஐ.நா. மனித உரிமைகள் உயர் ஆணையர் என்ற பெருமையை பிள்ளை பெற்றார். ஏழு நாட்களில், அவர் யாழ்ப்பாணம், கிளிநொச்சி, முல்லைத்தீவு மற்றும் திருகோணமலைக்கு பயணம் செய்து, காணாமல் போனவர்களின் குடும்பத்தினரையும், முல்லைத்தீவில் உள்ள காயல் கரையோரத்தில் இடிபாடுகளுக்கு மத்தியில் வசிக்கும் மக்களையும் சந்தித்தார்.

பயணத்தின் முடிவில் கொழும்பில் நடைபெற்ற பத்திரிகையாளர் சந்திப்பில், இலங்கை குறித்து ஐ.நா. அதிகாரி ஒருவரால் இதுவரை கூறப்பட்டதிலேயே மிகவும் வலுவான அறிக்கைகளில் ஒன்றை பிள்ளை வழங்கினார். "சண்டை முடிந்துவிட்டாலும், துயரம் இன்னும் ஓயவில்லை என்பதை அனைவரும் உணர்வது அவசியம்," என்று அவர் கூறினார். "துயரப்படுபவர்களுக்கு மரியாதை செலுத்தாமலும், உயிரிழந்த பல்லாயிரக்கணக்கான தமிழர்கள், சிங்களவர்கள், முஸ்லிம்கள் மற்றும் பிறரை நினைவுகூராமலும் காயங்கள் ஆறாது," என்றும் அவர் குறிப்பிட்டார்.

தான் சந்தித்த மக்கள் நடத்தப்பட்ட விதத்தை, "அந்தப் பயணத்தின் ஒரு மனக்கலக்கமூட்டும் அம்சம்" என்று அவர் விவரித்தார்.

2014 மார்ச் 27 அன்று, இரு தரப்பினராலும் செய்யப்பட்டதாகக் கூறப்படும் கடுமையான மீறல்கள் மற்றும் முறைகேடுகளை விசாரிக்குமாறு அவரது அலுவலகத்திற்கு ஆணையிடும் தீர்மானம் 25/1 , சபையால் 23 ஆதரவு வாக்குகளுடனும், 12 எதிர்ப்பு வாக்குகளுடனும், 12 பேர் வாக்களிக்காமலும் நிறைவேற்றப்பட்டது.

இலங்கை ஒத்துழைக்க மறுத்தபோதிலும், பிள்ளை தொடர்ந்து முன்னேறிச் சென்றார்; அதற்கு ஆலோசனை வழங்க பின்லாந்தின் முன்னாள் ஜனாதிபதியும் நோபல் பரிசு பெற்றவருமான மார்ட்டி அஹ்திசாரி, நியூசிலாந்தின் முன்னாள் ஆளுநர்-ஜெனரல் டேம் சில்வியா கார்ட்ரைட் மற்றும் பாகிஸ்தானிய மனித உரிமை வழக்கறிஞர் அஸ்மா ஜஹாங்கீர் ஆகிய மூன்று நிபுணர்களை அவர் நியமித்தார்.