ஞானசார தேரரின் காவியுடை விவகாரம் : கம்மன்பிலவின் குற்றச்சாட்டை முற்றாக மறுக்கும் சிறைச்சாலைத் திணைக்களம்

வெலிக்கடை சிறைச்சாலையில் தடுத்து வைக்கப்பட்டிருந்தபோது,கலகொட அத்தே ஞானசார தேரர் கட்டாயப்படுத்தி சிறை உடை அணிய வைக்கப்பட்டார் என்ற முன்னாள் அமைச்சர் உதய கம்மன்பிலவின் குற்றச்சாட்டுகளை சிறைச்சாலை திணைக்களம் முற்றாக மறுத்துள்ளது.

கொழும்பில் ஒக்டோபர் 12 அன்று நடைபெற்ற செய்தியாளர் சந்திப்பில் பேசிய உதய கம்மன்பில, ஞானசார தேரர் மற்றும் சிறைச்சாலை அதிகாரிகள் ஆகியோரின் ஆட்சேபனைகள் இருந்தபோதிலும், தேரர் கட்டாயப்படுத்தி சிறை உடை அணிய வைக்கப்பட்டதாகக் குற்றம் சாட்டினார்.

 சிறைச்சாலை விதிமுறைகளுக்கு ஏற்பவே செயற்பாடு

 இக்குற்றச்சாட்டுகள் குறித்து ஊடகவியலாளர்களின் கேள்விகளுக்குப் பதிலளித்த சிறைச்சாலை ஆணையாளரும் ஊடகப் பேச்சாளருமான சேனக பல்லேத்தன, இச்சம்பவம் தொடர்பான எந்தப் புகாரும் சிறைச்சாலைத் திணைக்களத்திற்குக் கிடைக்கப்பெறவில்லை என்று கூறினார்.

அத்தகைய சம்பவம் எதுவும் தனக்குத் தெரியாது என்று கூறிய அவர், சிறைச்சாலை அதிகாரிகள் நிறுவப்பட்ட சிறைச்சாலை விதிமுறைகளுக்கு ஏற்பவே செயல்படுகிறார்கள் என்பதை வலியுறுத்தினார்.

"இந்தக் குற்றச்சாட்டு தொடர்பாக எங்களுக்கு எந்தப் புகாரும் கிடைக்கவில்லை. அத்தகைய சம்பவம் குறித்து எங்களுக்குத் தெரியாது. சிறைச்சாலை விதிமுறைகளை நாங்கள் பின்பற்றுவதால், அத்தகைய நிகழ்வு நடைபெறுவதற்கு வாய்ப்பில்லை," என்று அவர் தெரிவித்தார்.

ஞானசார தேரருக்கு விடுதலை கோரி நடந்த ஊர்வலத்தில் பங்குகொண்ட நபர் மீது தாக்குதல்

சிறைச்சாலை ஆணையாளர் குழுவின் உறுப்பினராக நியமனம்  

இதற்கிடையில், சிறையில் உள்ள மதத் தலைவர்களுக்கான சிறை உடை விதிமுறைகளை மீளாய்வு செய்ய நியமிக்கப்பட்ட குழு குறித்து கருத்துத் தெரிவித்த பல்லேத்தன, சிறைச்சாலை ஆணையாளர் கஜநாயக்க அக்குழுவின் உறுப்பினராக நியமிக்கப்பட்டுள்ளதாக குறிப்பிட்டார்.

இவ்விவகாரம் குறித்த பரிந்துரைகளை உள்ளடக்கிய அறிக்கையை அக்குழு இந்த வாரமோ அல்லது அடுத்த வாரமோ சமர்ப்பிக்கும் என்று அவர் நம்பிக்கை தெரிவித்தார்.

சிறைச்சாலைச் சட்டங்களின் கீழ் உள்ள நடைமுறைகளில் தன்னிச்சையாக மாற்றங்களைச் செய்ய முடியாது என்பதைக் குறிப்பிட்ட பல்லேத்தன, அக்குழுவின் பரிந்துரைகளின் அடிப்படையிலேயே சிறைச்சாலைத் திணைக்களம் செயல்படும் என்று மேலும் தெரிவித்தார். 

ஞானசார தேரர் தொடர்பான விசாரணையிலிருந்து விலகிய நீதியரசர்