இலங்கையில் சின்ன வெங்காயம் மற்றும் முட்டை விலை அதிகரிப்பு
இலங்கையின் சந்தைகளில் கடந்த வாரத்துடன் ஒப்பிடுகையில், உள்நாட்டு சின்ன வெங்காயம் மற்றும் முட்டை ஆகியவற்றின் விலை அதிகரித்துள்ளதாக இலங்கை மத்திய வங்கி தெரிவித்துள்ளது.
மத்திய வங்கியினால் கடந்த இரு வாரங்களில் வெளியிடப்பட்ட வாராந்த பொருளாதார குறிகாட்டி அறிக்கைகளின் ஊடாக இந்த விடயம் வெளிப்படுத்தப்பட்டுள்ளது.
இதற்கமைய, புறக்கோட்டை சந்தையில் ஒரு கிலோகிராம் உள்நாட்டு சின்ன வெங்காயத்தின் சராசரி சில்லறை விலை, கடந்த 13 ஆம் திகதியுடன் நிறைவடைந்த வாரத்தில் 527 ரூபாய் 60 சதமாகப் பதிவாகியிருந்த நிலையில், 20 ஆம் திகதியுடன் நிறைவடைந்த வாரத்தில் 675 ரூபாயாக அதிகரித்துள்ளது.
அதிகரித்த விலை
ஒரு வார காலப்பகுதியில் சின்ன வெங்காயத்தின் விலை 147 ரூபாய் 40 சதத்தினால், சுமார் 27.9 சதவீதத்தினால் உயர்வடைந்துள்ளதாக சுட்டிக்காட்டப்பட்டுள்ளது.

இதே காலப்பகுதியில், புறக்கோட்டை சந்தையில் வெள்ளை முட்டை ஒன்றின் சராசரி சில்லறை விலை 37 ரூபாய் 68 சதத்திலிருந்து 41 ரூபாய் 75 சதமாக அதிகரித்துள்ளது. இது ஒரு வாரத்திற்குள் 4 ரூபாய் 07 சதத்தினால், சுமார் 10.8 சதவீத அதிகரிப்பாகும்
மேலும், நாரஹேன்பிட்டி பொருளாதார மத்திய நிலையத்திலும் ஒரு கிலோகிராம் உள்நாட்டு சின்ன வெங்காயத்தின் சராசரி சில்லறை விலை 700 ரூபாயிலிருந்து 820 ரூபாயாக உயர்ந்துள்ளது. இது 120 ரூபாய் அல்லது 17.1 சதவீத அதிகரிப்பாகப் பதிவாகியுள்ளது.
அத்துடன், அங்கு வெள்ளை முட்டை ஒன்றின் சராசரி சில்லறை விலை 39 ரூபாய் 60 சதத்திலிருந்து 42 ரூபாயாக அதிகரித்துள்ளமை குறிப்பிடத்தக்கது.
| செய்திகளை உடனுக்குடன் தெரிந்து கொள்ள IBC தமிழ் WHATSAPP CHANNEL இல் இணைந்து கொள்ளுங்கள்...! |