மட்டக்களப்பு - மண்முனை தென் எருவில் பற்று பிரதேச சபைக்குட்பட்ட

மட்டக்களப்பு - மண்முனை தென் எருவில் பற்று பிரதேச சபைக்குட்பட்ட குருக்கள்மடம் ஏத்தாலைக்குளம் பறவைகள் சரணாலயம், ஈரநிலப் பகுதி பாதுகாப்பு வலயமாக அறிவிக்கப்பட்டிருந்தாலும், அதன் பாதுகாப்பு நடைமுறைகள் கேள்விக்குறியாக மாறியுள்ளது.

சுற்றுச்சூழல் முக்கியத்துவம் வாய்ந்த இப்பகுதி, தற்போது கட்டுப்பாடின்றி குப்பைகள் கொட்டப்படும் இடமாக மாறிவருவது மிகவும் கவலைக்கிடமானது.

வாகனங்களில் வந்து மூட்டை மூட்டையாகக் கழிவுகளை வீசி செல்லும் சிலரின் பொறுப்பற்ற செயல்கள், அப்பகுதியில் வாழும் பறவைகளின் வாழ்வாதாரத்தையும், உயிரியல் சமநிலையையும் கடுமையாக பாதிக்கின்றன.

இதனால் உருவாகும் துர்நாற்றம், பொதுமக்கள் சாலையில் இயல்பாகச் செல்ல முடியாத அளவுக்கு பிரச்சினையை தீவிரப்படுத்தியுள்ளது.

இந்த நிலை, சுற்றுச்சூழல் பாதுகாப்பு குறித்த சட்டங்கள் நடைமுறையில் பலவீனமாக உள்ளதையும், கண்காணிப்பு முறைமைகள் போதுமானதாக இல்லையென்பதையும் வெளிப்படுத்துகிறது.

குப்பை கொட்டியவர்களை மக்கள் நேரடியாகப் பிடித்த சம்பவங்கள் இடம்பெற்றுள்ளன என்பது, பொதுமக்கள் விரக்தியையும் அதிகாரிகளின் தாமதத்தையும் தெளிவுபடுத்துகிறது.

பிரதேச சபை தவிசாளர் மேகசுந்தரம் வினோராஜ் அப்பகுதியை நேரில் பார்வையிட்டு, கண்காணிப்பு கேமரா பொருத்தி, பொதுச் சுகாதார பரிசோதகர் மூலம் கடுமையான சட்ட நடவடிக்கை எடுக்கப்படும் என தெரிவித்திருப்பது  முன்னேற்றமாக காணப்படுகிறது.

எனினும் கடந்த கால அரசியல் தலைமைகளுக்கும் சரி, தற்போதைய தலைமைகளுக்கும் சரி பொதுவாக இது ஒரு  தாமதமான பதில் என்ற விமர்சனத்திலிருந்து விடுபட முடியாது.

மேலும், இவ்வாறான பிரச்சினைகள் தனிப்பட்ட ஒரு பிரதேசத்திற்கே மட்டுப்படுத்தப்பட்டவை அல்ல.

நாட்டின் பல பகுதிகளிலும் ஈரநிலப் பகுதிகள் மற்றும் இயற்கை வளங்கள், சரியான மேலாண்மை இல்லாததால் அச்சுறுத்தலுக்கு உள்ளாகி வருகின்றன. இது, நிலையான அபிவிருத்தி குறித்த திட்டங்கள் நடைமுறையில் எவ்வாறு பலவீனப்படுகின்றன என்பதற்கான ஒரு எடுத்துக்காட்டாகும்.

இதற்கு தீர்வாக, கண்காணிப்பு கேமராக்கள் பொருத்துவது மட்டும் போதுமானதல்ல. தொடர்ந்து கண்காணிக்கும் அதிகாரிகள், உடனடி அபராத முறை, சட்ட அமலாக்கத்தில் வெளிப்படைத்தன்மை, மற்றும் பொதுமக்கள் பங்கேற்பு ஆகியவை உறுதி செய்யப்பட வேண்டும்.

பள்ளிகள் மற்றும் சமூக மட்டங்களில் சுற்றுச்சூழல் விழிப்புணர்வு நிகழ்ச்சிகள் நடத்தப்படுவது அவசியம். மேலும், திடக் கழிவு மேலாண்மை தொடர்பான திட்டங்கள் வலுப்படுத்தப்பட வேண்டும்.

மக்கள் எளிதில் அணுகக்கூடிய முறையில் குப்பை அகற்றும் சேவைகள், மறுசுழற்சி மையங்கள், மற்றும் ஒழுங்குமுறைப்படுத்தப்பட்ட குப்பை சேகரிப்பு முறைகள் அறிமுகப்படுத்தப்பட வேண்டும்.

முடிவாக, சுற்றுச்சூழலை பாதுகாப்பது அரசு அல்லது அதிகாரிகளின் பொறுப்பு மட்டுமல்ல. அது ஒவ்வொரு குடிமகனின் கடமையாகும். சட்டம் மட்டுமல்ல, சமூக ஒத்துழைப்பும் இருந்தால்தான் இவ்வாறான இயற்கை வளங்களை எதிர்கால தலைமுறைகளுக்காக பாதுகாக்க முடியும்.

துர்நாற்றம் வீசும் பெட்டிகள் - துருப்பிடித்த கழிவறைகள்: திருகோணமலை - கல் ஓயா தொடருந்து சேவையின் மோசமான நிலை

யாழ் நகர மத்தியில் நிகழும் அவலம் : மாநகரசபையின் பாராமுகம்