2015ஆம் ஆண்டிலேயே ஆரம்பமான உயிர்த்த ஞாயிறு தாக்குதல் திட்டம்! தமிழ் மக்களை இலக்கு வைத்த சதி பின்னணி

குற்றப் புலனாய்வுத் துறையின் காவலில் விசாரிக்கப்பட்டு வரும், அரச புலனாய்வுதுறையின் முன்னாள் தலைவர் சுரேஷ் சலே தொடர்பான வழக்கு விசாரணையின் போது மேலதிக மன்றாடியர் நாயகமும் ஜனாதிபதி சட்டத்தரணியுமான திலீப பீரிஸ் முன்வைத்த கருத்துக்கள் தமிழ் மக்களை இலக்கு வைத்த சதி பின்னணி குறித்த தகவல் அம்பலப்படுத்தியுள்ளது.

உயிர்த்த ஞாயிறு தாக்குதல் குற்றத்திற்கான சதித்திட்டம் 2015-ஆம் ஆண்டிலிருந்தே செயல்பட்டு வந்துள்ளது என்ற கருத்தை முன்வைத்த அவர், உண்மையான குற்றவாளிகளை மறைக்கும் பின்னணியில் வவுனதீவு விவகாரம் அரங்கேரியதாகவும் நேற்று(22.04.2026) நீதிமன்றுக்கு அறிவித்துள்ளார்.

பயங்கரவாதத் தடுப்புச் சட்டத்தின் கீழ் கைது செய்யப்பட்டு, குற்றப் புலனாய்வுத் துறையின் காவலில் விசாரிக்கப்பட்டு வரும், அரச உளவுத்துறையின் முன்னாள் தலைவரும் ஓய்வுபெற்ற ராணுவ மேஜர் ஜெனரலுமான சுரேஷ் சலே தொடர்பான வழக்கு விசாரணைக்கு எடுத்துக்கொள்ளப்பட்டபோது அவர் இதனை கூறியுள்ளார்.

ஏழு ஈஸ்டர்கள் கண்ணீரைச் சிந்தியும் இன்னும் சூத்திரதாரி தென்படவில்லை...

சட்டமா அதிபருக்கு முழு ஒத்துழைப்பு

இந்தச் சம்பவம் தொடர்பான விசாரணையில்,  உயிர்த்த  ஞாயிறு தாக்குதல்களில் ஈடுபட்ட அனைவரும், அடுத்த ஆண்டு அதாவது தாக்குதலின் எட்டாவது ஆண்டு நிறைவுக்கு முன்னர் நீதியின் முன் நிறுத்தப்படுவார்கள் என்று குற்றப் புலனாய்வுத் துறை நீதிமன்றத்தில் தெரிவித்துள்ளது.

மேலும், இராணுவத் தளபதி மற்றும் இராணுவப் புலனாய்வுப் பணிப்பாளர் உள்ளிட்ட அனைத்து அரச அதிகாரிகளும் சட்டமா அதிபருக்கு முழு ஒத்துழைப்பு அளிக்க வேண்டும் என்றும் கோட்டை நீதவானால் அறிவிக்கப்பட்டுள்ளது.

விசாரணையில் சட்டமா அதிபருக்கு ஒத்துழைக்காத அரச அதிகாரிகள் யாரேனும் இருந்தால், அவர்கள் மீது குற்றப்பத்திரிகை தாக்கல் செய்யவும், வழக்குகள் பதிவு செய்யவும் வாய்ப்புள்ளது என்றும் நீதவானால் சுட்டிக்காட்டப்பட்டுள்ளது.

கிழக்கில் செயற்பட்ட முஸ்லீம் படையணி: அழிக்கப்பட்ட உயிர்த்த ஞாயிறு தாக்குதல் சாட்சிகள்

இது ஒரு விளையாட்டு அல்ல 

எந்தவொரு அதிகாரியும் சந்தேக நபராகவும், அரசாங்கத்திற்கு எதிரான நபராகவும் மாறும்போது, ​​அரச நிறுவனங்களால் அவருக்குப் பிரதிநிதித்துவம் அளிக்க இயலாது என்றும், சட்டமா அதிபரே அனைத்து அரச நிறுவனங்களின் பிரதம சட்ட அதிகாரி என்றும் நீதிமன்றம் மேலும் விளக்கியுள்ளது.

குற்றப் புலனாய்வுத் திணைக்களத்தின் பணிப்பாளர், சிரேஷ்ட காவல்துறை கண்காணிப்பாளர் ஷானி அபேசேகர மற்றும் ஆய்வாளர் மெண்டிஸ் ஆகியோர் அடங்கிய அதிகாரிகள் குழு, இச்சம்பவம் தொடர்பான விசாரணைகளின் முன்னேற்றத்தை விவரித்து எட்டுப் பக்க அறிக்கை ஒன்றை நீதிமன்றத்தில் சமர்ப்பித்தது.

விசாரணையை ஷானி அபேசேகரவிடமிருந்து மாற்றி, வேறொரு அதிகாரிக்கோ அல்லது பிரிவிற்கோ ஒப்படைக்க வேண்டும் என சுரேஷ் சலேயின் சட்டத்தரணி அசித் சிறிவர்தன விடுத்த கோரிக்கையை நிராகரித்த நீதவான், நடைபெற்று வரும் விசாரணைகளில் நீதிமன்றம் திருப்தி அடைந்துள்ளதாக வலியுறுத்தியுள்ளார்..

நீதியை நிலைநாட்டும் முயற்சியில், முன்வைக்கப்படும் உண்மைகள் சந்தேகத்திற்கு இடமின்றி நிரூபிக்கப்பட வேண்டும், இல்லையெனில் பாதிக்கப்பட்டவர்கள் கடுமையான பாதிப்புக்கு உள்ளாக நேரிடும், எனவே இது ஒரு விளையாட்டு அல்ல என்று இதன்போது விசாரணை அதிகாரிகளுக்கு நீதவான் நினைவூட்டியுள்ளார்.

உயிர்த்த ஞாயிறு தாக்குதலுக்கு முன்னரான புலனாய்வு எச்சரிக்கையின் திசை திருப்பம்

கபூர் மாமா

இந்நிலையில் அரசுத் தரப்பு சார்பில் முன்னிலையான சட்டத்தரணி திலீப பீரிஸ், சிரேஷ்ட அரசு சட்டத்தரணி ஓஸ்வால்ட் பெரேராவுடன் இணைந்து வழக்கை முன்னின்று நடத்தினார்.

2019-ஆம் ஆண்டு நிகழ்ந்த இந்தக் குற்றத்திற்கான சதித்திட்டம் 2015-ஆம் ஆண்டிலிருந்தே செயல்பட்டு வந்துள்ளது என்ற தகவல் வெளியாகியுள்ளது என அவர் நீதிமன்றத்தில் தெரிவித்தார்.

இது இரண்டு வவுணதீவு காவல்துறை அதிகாரிகள் கொலை தொடர்பான சம்பவம் மட்டுமல்ல என்றும், இந்தத் தாக்குதலுக்குப் பிறகு 'கபூர் மாமா' வழியாக சஹ்ரான் ஹாஷிமுக்குச் செல்லும் பாதை இந்தச் சதித்திட்டத்தின் காரணமாகத் தடுக்கப்பட்டது என்றும் அவர் மேலும் கூறினார்.

உண்மையான குற்றவாளிகளை மறைத்து, தமிழர்கள் மீது பழி சுமத்துவதற்கான சதித்திட்டம் தீட்டப்பட்டதற்கான தகவல் கிடைத்துள்ளதாகவும் அவர் தெரிவித்தார்.

சிரேஷ்ட பிரதி காவல்துறைத் தலைவர் ஜெயசுந்தர உட்பட 105 பேரிடம் வாக்குமூலங்கள் பதிவு செய்யப்பட்டுள்ளன.

வெற்றிகரமாக நிறைவிற்கு வரப்போகும் ஈஸ்டர் தாக்குதல் விசாரணை : அனுர தரப்பு அறிவிப்பு

இராணுவப் புலனாய்வு அதிகாரிகளுக்கு எதிராக சட்ட நடவடிக்கை எடுக்கப்படும் போதெல்லாம், அவர்களைப் பிரதிநிதித்துவப்படுத்த பொதுத்துறை வளங்களைப் பயன்படுத்துவதில் அரசுத் தரப்புக்கு அனுபவம் இருப்பதால்,  தாக்குதல் விசாரணைகளுக்கு உதவுமாறு இராணுவத் தளபதி மற்றும் புலனாய்வுப் பணிப்பாளர் இயக்குநருக்கு உத்தரவு பிறப்பிக்க வேண்டும் என்றும் அரசுத் தரப்பு கோரியுள்ளது.

எனினும், சந்தேக நபரான சுரேஷ் சலேவுக்காக முன்னிலையான சட்டத்தரணி அசித் சிரிவர்தனா, தனது கட்சிக்காரர் 2019 ஒக்டோபரில் அரச புலனாய்வு இயக்குநராக நியமிக்கப்பட்டார் என்றும், எனவே தாக்குதல் நடந்த நேரத்தில் அவர் அந்தப் பதவியில் இல்லை என்றும் தெரிவித்தார்.

ஈஸ்டர் தாக்குதல் விசாரணைகள்! ஐக்கிய நாடுகள் சபை வெளியிட்ட அறிவிப்பு

எந்தத் தொடர்பும் இல்லை

தாக்குதல் விசாரணை தொடர்பான 79 அதிகாரிகளின் இடமாற்றத்திற்கும் அவருக்கும் எந்தத் தொடர்பும் இல்லை என்றும் அந்த சட்டத்தரணி கூறியுள்ளார்.

தற்போது ஆறரை அடி நீளமும் நான்கு அடி அகலமும் கொண்ட ஒரு சிறிய அறையில் அவர் தடுத்து வைக்கப்பட்டுள்ளதால், அவரது மனநிலை, பார்வை மற்றும் ஊட்டச்சத்து நிலைகள் கடுமையாக மோசமடைந்துள்ளதாகவும், அவருக்கு மருத்துவ சிகிச்சை தேவைப்படுவதாகவும் அவர் நீதிமன்றத்தில் கோரிக்கை விடுத்தார்.

மேலும், சலே இந்தச் சம்பவம் குறித்து நீதவான் முன் வாக்குமூலம் அளிக்கத் தயாராக இருப்பதாகவும் அந்த சட்டத்தரணி தெரிவித்தார்.

இந்நிலையில் உண்மைகளைக் கருத்தில் கொண்ட நீதிபதி, வாக்குமூலம் தேவைப்பட்டால், அடுத்த நீதிமன்றத் தேதியில் அதற்கான கோரிக்கை விடுக்கப்பட வேண்டும் என்று உத்தரவிட்டார்.

சந்தேக நபரின் உடல்நலப் பரிசோதனைக்காக, அவரை நீதித்துறை மருத்துவர் மூலம் மனநல, கண் மற்றும் ஊட்டச்சத்து நிபுணர்களிடம் அனுப்பவும் உத்தரவு பிறப்பிக்கப்பட்டது.

இச்சம்பவம் தொடர்பாக நீதிமன்றக் காவலில் உள்ள இரண்டு காவல்துறை அதிகாரிகளும் சிறை அதிகாரிகளாலும், சுரேஷ் சலே குற்றப் புலனாய்வுத் துறையாலும் நீதிமன்றத்தில் முன்னிலைப்படுத்தப்பட்டனர்.

மேலும் சுரேஷ் சலேவிடம் தடுப்புக் காவல் உத்தரவுகளின் கீழ் மேலும் விசாரணை நடத்த குற்றப் புலனாய்வுத் துறைக்கு அனுமதி வழங்கப்பட்டது.

இந்த வழக்கை மே 20 அன்று மீண்டும் விசாரணைக்கு அழைக்குமாறு நீதிமன்றம் உத்தரவிட்டதுடன், விசாரணையின் முன்னேற்றம் குறித்து அத்தினதிக்குள் அறிக்கை சமர்ப்பிக்குமாறு குற்றப் புலனாய்வுத் துறைக்கும் உத்தரவிட்டது.